YA MAI NEMAN ALKHAIRI; KA SHIRYA!! (يا باغيَ الخير استعدْ)

YA MAI NEMAN ALKHAIRI; KA SHIRYA!!

(يا باغيَ الخير استعدْ)

'Yan kasuwa, ma'abuta kasuwanci su kan yi cikakken shiri, a lokutan kasuwanci, domin fatan samun fiyayyen riba.

Su kuma Muminai, suna yin shiri domin fiskantar watan azumi na Ramadhana (wato, WATA MAI TARIN ALBARKA) da nau'ukan bauta, Sai su

1-    Yawaita yin azumi a Sha'aban, domin ya kasance shiri ga azumtar watan Ramadana.

2-    Da kuma yin Tuba ta gaskiya, da ficewa daga ayyukan zunubai, da mayar da kayan da suka zalunta, izuwa ga Ma'abutansu.

3-    Da yafiya da yin sulhu, da kawar da dukkan sabani, da warware jayayya, domin mu kasance mun cancanci samun gafarar Allah.

4-    Da kuma, koyan hukunce-hukuncen azumi, da laddubansa, da ababen da suke bata azumi, da abinda ke halatta ga mai azumi, da wanda baya halatta, domin azuminmu ya kasance ingantacce.

5-    Da nisantar ayyuka masu shagaltarwa, gwargwadon iko, domin mu samar da lokacin yin ibadodi a cikin watan Ramadana, Kuma hakika Sufyan As-Sauriy idan watan azumi ya shigo, ya kan bar kowane abu; domin ya fiskanci karatun Alkur'ani.

6-    Kuma lallai watan azumi, dama ce mai matukar girma domin nisantar munanan al'adu, da azizita halaye ababen yabo, Allah Ta'alah ya ce:

(يا أيها الذين ءامنوا كُتب عليكم الصيامُ كما كُتب على الذين من قبلكم لعلكم تتقون) [البقرة: 183].

Ma'ana: "YA KU WADANDA SUKA YI IMANI AN WAJABTA AZUMI AKANKU, KAMAR YADDA AKA WAJABTA SHI GA WADANDA SUKE A GABANINKU, TSAMMANINKU ZA KU SAMU TAKAWA" [Bakara: 183].