SHA’ABAN WATAN DAGA AYYUKAN BAYI NA SHEKARA GA UBANGIJIN TALIKAI فضائل شعبان

SHA’ABAN WATAN DAGA AYYUKAN BAYI NA SHEKARA GA UBANGIJIN TALIKAI

فضائل شعبان

Watan Rajab ya shude, Sai Sha’aban ya fiskanto

Kuma an sanya masa suna SHA’ABAN ne, saboda yadda kabilu ke yin kungiya-kungiya domin fita yaki da kai farmaki, bayan ficewan watan Rajab Mai alfarma (wanda ba a yaki cikinsa).

Sha’aban, Me ya sanar da kai abinda ake kiransa: WATAN SHA’ABAN?

Wata ne na yi tanadi da shiri ga watan Ramadhana,

Watan yawaita azumi ne (nafila), da tilawar Alkur’ani; domin Annabi –sallal lahu alaihi wa sallama- ya kasance yana yawaita azumi a cikinsa, saboda wata ne da mutane ke gafala akansa, kuma shine watan da ake daga ayyukan bayi na tsawon shekara; gaba dayansu; Usamah bn Zaid –radiyal Lahu anhu- yana cewa:

  “NACE: YA MANZON ALLAH, BAN GA KANA AZUMTAR WANI WATA BA, IRIN YADDA KAKE AZUMTAR WATAN SHA’ABAN, SAI YA CE: SABODA SHI, WATA NE DA MUTANE KE GAFALA AKANSA, DA KE TSAKANIN RAJAB, DA WATAN RAMADHANA, KUMA SHINE WATAN DA AKE DAGA AYYUKAN BAYI GA UBANGIJIN TALIKAI; SAI NAKE SON A DAGA AIKINA GARE SHI ALHALIN INA AZUMI”.

Ibnul kayyim -rahimahulLahu- yace:

“LALLAI AYYUKAN SHEKARA ANA DAGA SU ZUWA GA ALLAH NE A CIKIN WATAN SHA’ABAN”.

Kuma Magabatan kwarai sun kasance, suna yawaita karatun Alkur’ani a cikin watan Sha’aban, domin a cikinsu akwai wadanda suke rufe shagunansu domin su shagaltu da yawaita karatun Alkur’ani;

Salamah bn Kuhailin yana cewa:

“ANA FADIN CEWA: WATAN SHA’ABAN, WATAN MASU KARATUN KUR’ANI NE”.

Kuma Magabatan kwarai sun kasance suna kwadayin taimakon miskini a cikin watan Sha’aban, domin ya fiskanci watan Ramadhana da abinda zai jiyar da iyalansa da ‘ya’yansa dadi; domin an ruwaito daga wasu daga cikin magabantan kwarai cewa, sun kasance idan watan Sha’aban ya shigo, sai su fitar da zakkar dukiyarsu, domin su karfafa wa mai rauni da miskini, akan azumtar watan Ramadhana.

Kuma a cikin watan Sha’aban akwai sabar wa Rai, da shirya ta, saboda ta iya fiskantar watan Ramdhana da mafificin zantuka da kuma ayyuka.