BA A BADA KUDI A MADADIN ZAKKAR FIDDA-KAI

ZAKKAR KONO SA'IY NE GUDA XAYA DAGA ABINCIN GARI

Amsa fatawa daga Shehin malami, Abdul'aziz xan Abdullahi Ibnu-baaz   

-Allah yayi masa rahama- 

Yabo ya tabbata ga Allah, salati da sallama su qara tabbata ga Manzon Allah, da kuma iyalansa da sahabbansa, da duk wanda ya shiryu da shiriyarSa, Bayan haka:

Tambayoyi sun yi yawa kan fitar da shinkafa a matsayin zakkar fidda kai (fixr), da kuma fitar da kuxi a madadin abincin? ([1])

Amsa: Haqiqa ya tabbata daga Manzon Allah (صلى الله عليه وسلم) cewa lallai shi:

«فَرَضَ زَكَاةَ الْفِطْرِ عَلَى الْمُسْلِمِينَ صَاعًا مِنْ تَمْرٍ، أَو صَاعًا مِنْ شَعِيرٍ، وَأَمَرَ بها أَنْ تُؤَدَّى قَبْلَ خُرُوجِ النَّاسِ إِلَى الصَّلَاةِ».

Ma'ana: "Ya wajabta zakkar kono akan musulmai, sa'iy guda na dabino, ko sa'iy na alkama (sha'ir), kuma ya yi umurnin cewa a bada ita gabanin fitan mutane zuwa ga sallah"([2]). Yana nufin: sallar idi.

Ya zo a cikin sahihul Bukhariy da Muslim daga Abu-said alkhudriy (رضي الله عنه) yace:

«كُنَّا نُخْرِجُ زَكَاةَ الْفِطْرِ فِي زَمَنِ النَّبِي صَلَّى اللهُ عَلَيْهِ وَسَلَّم صَاعًا مِنْ طَعَامٍ، أَوْ صَاعًا مِنْ شَعِيرٍ، أَوْ صَاعًا مِنْ تَمْرٍ، أَوْ صَاعًا مِنْ أَقِطٍ، أَوْ صَاعًا مِنْ زَبِيبٍ».

Ma'ana: "Mun kasance muna fitar da zakkar fidda kai a zamanin Annabi (صلى الله عليه وسلم): sa'in abinci, ko sa'in sha'ir, ko sa'in dabino, ko sa'in cukui, ko sa'in busasshen inabi (zabib)". ([3])

Kuma mutane da dama sun fassara lafazin abinci (xa'am) da ya zo a cikin wannan hadisin; da cewa shine: Acca (al-burru), wassu kuma suka fassara shi da: duk wani abin da mutane suka riqa a matsayin abinci; koma-menene shi; accan ne ko masara ko dawa ko wassunsu.

Wannan kuma shine daidai, saboda zakka yalwatawa ce daga mawadata ga talakawa, kuma ba wajibi ba ne akan mutum ya yalwata daga abin da ba shine abincin garinsu ba. Kuma babu shakka lallai shinkafa abu ne da aka riqa a matsayin abinci a qasar Saudiyya, kuma abinci ne mai kyau mai tsada, kuma harma (shinkafa) ta fi sha'ir xin da hadisai suka nuna cewa yana iya isarwa, ta fi shi daraja da falala, saboda haka za a fahimci cewa babu laifi a fitar da shinkafa a matsayin zakkar fidda kai (fixr).

Wajibin kuma shine a bada sa'iy xaya a duk dangogin abinci, da irin sa'in Annabi (صلى الله عليه وسلم), wanda kuma shine kamfata guda huxu da hannaye guda biyu matsaikata (ba manya ba, ba kuma qanana ba) da aka cika su, kamar yadda wannan bayanin ya zo a cikin littafin "qamus" da wassunsa. Shi kuma (sa'iy) da lissafin ma'auni shi ne: kusa da kilogiram uku. Don haka; Idan musulmi ya fitar da "sa'iy xaya" na shinkafa ko waninsa na abincin qasarsa: hakan ya isar masa, koda kuwa baya cikin dangin nau'ukan abinci da aka ambata a cikin wannan hadisin, a mafi ingancin zance biyu na maluma. Kuma babu laifi in ya fitar da kwatankwacin sa'iy xaya da ma'aunin kilo, wanda shi ne: kusan kilo uku.

Kuma wajibin shine a fitar da "zakatul fixr" ga yaro da babba, da namiji da mace, da xa, da kuma bawa daga cikin musulmai.

Abun da yake cikin uwar mahaifa shi kuma ba wajibi ba ne a fitar masa da zakkar kono, da ijma'in maluma, Saidai kuma mustahabbi ne a cire masa, saboda Usman xan Affan (رضي الله عنه) ya aikata hakan.

Kuma wajibi ne a fitar da ita (zakatul fixr) gabanin sallar idi, baya kuma halatta a jinkirta har sai bayan sallah, Saidai kuma babu laifi a fitar da ita gabanin idi da yini xaya ko da yini biyu; Kuma da haka ne za a san cewa lallai farkon lokaci na halaccin fitar da ita a mafi ingancin zancen maluma shine: daren ashirin da takwas (daren 28), saboda wata yana kasancewa –a wassu lokutan- kwana ashirin da tara (29), ya kan kasance kuma –a wassu lokutan- kwana talatin (30), kuma sahabban Manzon Allah (صلى الله عليه وسلم) sun kasance suna fitar da zakatul fixr gabanin idi yini xaya ko da yini biyu.

Waxanda ake basu zakatul fixr su ne: fakirai da miskinai, kuma ya tabbata daga Abdullahi xan Abbas (رضي الله عنه) ya ce:

«فَرَضَ رَسُولُ اللَّهِ صَلَّى اللهُ عَلَيْهِ وَسَلَّمَ زَكَاةَ الْفِطْرِ طُهْرَةً لِلصَّائِمِ مِنَ اللَّغْوِ وَالرَّفَثِ، وَطُعْمَةً لِلْمَسَاكِينِ، مَنْ أَدَّاهَا قَبْلَ الصَّلَاةِ، فَهِيَ زَكَاةٌ مَقْبُولَةٌ، وَمَنْ أَدَّاهَا بَعْدَ الصَّلَاةِ، فَهِيَ صَدَقَةٌ مِنَ الصَّدَقَاتِ».

Ma'ana: "Manzon Allah (صلى الله عليه وسلم) ya farlanta zakkar fidda kai, tsarki ga mai azumi daga wargi da batsa, kuma abinci ne ga miskinai, duk wanda ya bada ita gabanin fita sallah to wannan zakka ce karvavviya, wanda kuma ya bada ita bayan sallah to sadaka ne daga cikin sadakoki"([4]).

            Kuma baya halatta a fitar da qimar wannan zakkah cikin kuxi a wajen mafi yawan maluma, kuma wannan ra'ayin shine ya fi qarfin dalilai, don haka wajibi ne a fitar da zakkar fidda-kai cikin abinci, kamar yadda Manzon Allah (صلى الله عليه وسلم) ya aikata hakan Shi da sahabbanSa (رضي الله عنهم). Kuma wannan ita ce mazhabar yawa-yawan maluma.

Allah shi ne abun roqo kan ya datar da mu da musulmai gabaxayansu kan fahimtar addininsa, da tabbatuwa akansa.

Muna kuma roqonsa da ya gyara mana zukatanmu da aiyukanmu, lallai shi mai kyauta ne mai karamci.

Yabo da sallama su qara tabbata ga Annabinmu Muhammadu da iyalanSa da sahabbanSa.

$&$

---

([1])  MAJMU'U FATAWA na Ibnu-baaz, (5/ 92-93), tattarawar: Ad-dayyaar, da Ahmad Al-baaz, da kuma MAJMU'U FATAWA WA MAQAALAAT MUTANAWWI'AH, (14/200).

([2])  Bukhariy da Muslim suka rawaito shi daga hadisin Abdullahi xan Umar (رضي الله عنه), (Bukhariy, lamba: 1503, da Muslim: lamba: 984, ya zo a wuri na biyu a wajen Muslim a taqaice, lamba: 986).

([3])  Bukhariy ya rawaito shi, (lamba: 1506), da Muslim (lamba: 985).

([4])  Abu-dawud ya rawaito shi, (lamba: 1609), da Ibnu-maajah, (lamba: 1827).