WUCE IYAKAR SHARI'A CIKIN ADDU'A (الاعتداء في الدعاء)

WUCE GONA-DA-IRI CIKIN ADDU'A

(الاعتداء في الدعاء)

Menene wuce gona-da-iri cikin ADDU'A wadda Allah ya hane mu aikata shi? ya kuma bayyana cewa baya son ma'abutansa, cikin fadinsa:

(ادعوا ربكم تضرعًا وخفية إنه لا يحب المعتدين) [سورة الأعراف، 55].

tare da ambato surorinsa da nau'ukansa?

Bismillahir rahmanir raheem///

A ayar da ta gabata Allah (s w t) yayi umurni kuma yayi hani; yayi umarni ya kuma kwadaitar kan: Yin addu'a da rokonsa a hali na kankan-da-kai, da kuma yanayi dake kasa da bayyanawa (ma'ana: addu'ar bawa ta kasance a boye; saboda yana rokon mai jine makusanci, ba kurma ko kuma wanda ba ya halarce ba, kamar yadda yazo cikin Sahihul Bukhari, [lamba: 2992], Muslim, [2704].

(ادعوا ربكم تضرعا وخفية).

Sa'annan sai kuma Allah ta'alah yayi hani da tsawatarwa kan: Ketare iyaka da wuce-gona-da-iri, ta hanyar bayyana rashin soyayyarsa ga ma'abota hakan, a cikin fadinsa:

(إنه لا يحب المعتدين).

Maluma su ka ce: Duk da cewa ayar tana nuna: Gamemmen rashin son Allah ga/ daukacin masu wuce iyaka a kowanni babi, (don haka: Duk mai ketare haddin shari'a a kowanne ibada Allah baya sonsa) Sai dai kasancewar zuwan hanin (wuce-gona-da-iri -a ayar-) yazo ne bayan umurni kan rokon Allah: Hakan na nuni na musamman kan: HANI BISA GA KETARE HADDIN SHARI'A CIKIN ADDU'A

Shi kuma 

(الاعتداء).

Shine: ketare iyakar da shari'a tace a tsaya akanta. Shi yasa a fassare- fassaren hausa a ke fassara shi da: Wuce-gona-da-iri.

Zai yi kyau a sani cewa daga cikin wuce iyaka a babin addu'a (roko) akwai wanda ke kaiwa izuwa ga kafirci, shirka (me fitarwa daga musulunci), yayin da akwai wadda bai kai ga hakan ba (tare da cewa, Allah yaki mai aikata shi; don haka haramun ne) kamar yadda zai bayyana daga nau'ukan wuce gona-da-iri cikin addu'a.

NAU'UKAN WUCE-GONA-DA-IRI CIKIN ADDU'AH:

Lallai kamar yadda ya gabata ketare iyakar Allah a cikin addu'a mataki-mataki ne, akwai wanda yake fitar da ma'abucinsa daga musulunci, akwai kuma wanda bai kai i zuwa ga hakan ba, A nan zan ambato wassu nau'uka na kowanne daga cikinsu; Kamar haka:

1-  Yana daga cikin wuce-gona-iri a cikin addu'a, kai shine ma yafi hatsari da cutar da addinin bawa: Rokon wani Allah –ko shi wanene- rokonsa abinda ba wanda zai iya baka shi sai Allah (s w t), kamar yaye bala'i, jawo wani amfani, warkar da maras lafiya, bada arziki da 'ya'ya, neman dawowan batacce, d. s. Ya shiga cikin wannan nau'in: Rokon Shehu da Bello da wassu daga cikin mutane a kasar hausa-fulani ke yi a lokacin faduwa, a madadin komawa zuwa ga Allah tare da cewa: Innah lillahi wa innah ilaihi raaji'una, ko makamancin hakan.

Lallai wannan nau'i na wuce iyaka ya kai yadda ya kai wajen muni, kuma ubangiji ta'alah ya kafirta ma'abocinsa a wurare da dama, daga cikinsu akwai fadinsa:

(ومَن أضل ممن يدعو من دون الله مَن لا يستجيب له إلى يوم القيامة وهم عن دعائهم غافلون. وإذا حُشر الناس كانوا لهم أعداء وكانوا بعبادتهم كافرين) [سورة الأحقاف: 5-6].

Wannan mas'alar saboda girmanta tana bukatan wassu zamanmaki. Allah ya bamu ikon fadakar da duk wadda mu ka ji yana aukawa cikin hakan, musamman tsofaffi da jahilai. Allah shi kyauta.

2-  Yana daga cikin wuce-gona-da-iri a cikin addu'a: Bawa ya roki abubuwan da Allah ya kebanta da su a rububiyyarsa ko sifofinsa, kamar ya nemi: Taskokin Allah su kasance a wajensa; don ya rinka bawa wanda yaso abinda ya so, ya kuma hana wani abinda yaso, ko kuma ya roki sanin gaibu, da sauransu.

3-   Yana daga cikin wuce-gona-da-iri a cikin addu'a: Bawa ya roki abubuwan da basu dace da shi ba, kuma Allah ba zai ba shi su ba; kamar ya roki a bashi matsayi da daraja irin ta annabawa da manzanni, ko ya nemi a mayar da shi mala'ika; da zai wofanta ga barin bukatar abinci da abin sha, da biyan bukata. ko ya roke shi ya kasantar da shi ma'asumi kamar mala'iku ko annabawa da sauransu.

4-  Yana daga cikin wuce-gona-da-iri a cikin addu'a: Bawa ya roki abinda aka sani cewa Allah cikin hikimarsa ba zai aikata su ba; kamar ya roki Allahn ya dawwamar da shi ba mutuwa har zuwa kiyama; (ma'ana: kar ya dauki ransa), ko ya nemi a kawar masa da halayya da bukatu na 'dan adamtaka kamar ci, sha, barci, mantuwa, ko ya musuluntar da duk duniya, ko yasa kowa-da-kowa cikin aljanna, ko ya bashi 'da ba tare da mace ba, da sauransu.

5-  Yana daga cikin wuce-gona-da-iri a cikin addu'a: Bawa ya roki abinda Allah ya hane shi, kamar mai neman taimakon Allah kan aikata haramun, misali: ya roke shi ya saukake masa hanyar alfasha ko magudi da zalunci da handama, ko ya taimake shi kan wani tafiyar da ya shirya don yin barna da zunubi a cikinta; kamar sata, fashi, d. s.

6-  Yana kuma daga cikin wannan nau'in: Bawa ya nemi Allah yayi gafara ga wadda ya mutu yana kafiri ko shi wanene; saboda Allah ya hana hakan, Lallai kuma wannan na faruwa da yawa musamman a zamaninmu; zamanin fitintinu da kashe-kashe, ta yadda sau da dama akan samu masu kashe mutanen da basu san me yasa suka kashe ba, kamar yadda mutane da-dama da aka da dama daga wadanda ake kashewan suma basu san dalilin da yasa aka kashe su ba. To a irin wannan hali in har labarin irin wannan mutuwa mai abun tausayi yazo maka sai kace: Allah ya jikan musulmi. Amma bai halatta kayi addu'ar gafara, rahama da jin kai ga wanda ba musulmi ba koda kuma wanene shi; mahaifi ne, mahaifiya, 'da, balle waninsu; saboda Allah (s w t) ya ce:

(وَلَا تُصَلِّ عَلَى أَحَدٍ مِنْهُمْ مَاتَ أَبَدًا وَلا تَقُمْ عَلَى قَبْرِهِ؛ إِنَّهُمْ كَفَرُوا بِاللَّهِ وَرَسُولِهِ وَمَاتُوا وَهُمْ فَاسِقُونَ) [سورة التوبة، 84]

Ma'ana: "Kada kayi addu'a ko sallah, ga 'daya daga cikinsu da ya mutu, har abada, kuma kada ka tsaya kan kabarinsa; lallai su sun kafirce ma Allah da Manzonsa, kuma sun mutu suna fasikai (da suka fice daga 'da'a ma Allah; kafirai.

Allah ya sake cewa: "Bai halatta ba ga wannan Annabi da wadanda suka yi imani da shi: Su nemi gafara wa mushirkai, koda kuwa dangi ne makusanta, bayan ya bayyana musu cewa su 'yan wuta ne". Kamar yadda Annabi Ibrahimu (a s) da lamarin ya bayyana masa cewa mahaifinsa ya mutu akan kafirci barranta yayi daga gare shi:

(مَا كَانَ لِلنَّبِيِّ وَالَّذِينَ آَمَنُوا أَنْ يَسْتَغْفِرُوا لِلْمُشْرِكِينَ وَلَوْ كَانُوا أُولِي قُرْبَى مِنْ بَعْدِ مَا تَبَيَّنَ لَهُمْ أَنَّهُمْ أَصْحَابُ الْجَحِيمِ *** وَمَا كَانَ اسْتِغْفَارُ إِبْرَاهِيمَ لِأَبِيهِ إِلَّا عَنْ مَوْعِدَةٍ وَعَدَهَا إِيَّاهُ فَلَمَّا تَبَيَّنَ لَهُ أَنَّهُ عَدُوٌّ لِلَّهِ تَبَرَّأَ مِنْهُ إِنَّ إِبْرَاهِيمَ لَأَوَّاهٌ حَلِيمٌ) [سورة التوبة: 113-114].

Wannan kuma shine dalilin da yasa Allah bai bada izini ga manzonsa annabi Muhammad (tsira da amincin Allah su kara tabbata a gare shi) a lokacin da ya nemi izinin neman gafara wa mahaifiyarsa. Sannan sai aka bashi izinin ya je ziyartar kabarinta, kamar yadda Muslim ya ruwaito [lamba: 976]:

عَنْ أَبِي هُرَيْرَةَ قَالَ: زَارَ رَسُولُ اللَّهِ صَلَّى اللَّهُ عَلَيْهِ وَسَلَّمَ قَبْرَ أُمِّهِ فَبَكَى وَأَبْكَى مَنْ حَوْلَهُ، وَقَالَ: "اسْتَأْذَنْتُ رَبِّي عَزَّ وَجَلَّ فِي أَنْ أَسْتَغْفِرَ لَهَا فَلَمْ يُؤْذَنْ لِي، وَاسْتَأْذَنْتُ فِي أَنْ أَزُورَ قَبْرَهَا فَأَذِنَ لِي؛ فَزُورُوا الْقُبُورَ فَإِنَّهَا تُذَكِّرُكُمْ الْمَوْتَ".

Tun da ko haka ne; To akwai wani mushirki, kafiri da zai mutu akan kafirci ko shirkarsa, ko wanene shi? wanda zaka nema masa gafara! Amsar itace: Babu!

Za dai ka ji tausayinsa, ko ka jiye masa, shi da kuma sauran kafirai irin yadda suka yi asarar rayuwarsu; asara ta din-din-din.

Amma addininmu ya hana nema musu gafarar Allah. Kuma saba wa hakan na daga cikin nauoin wuce gona-da –iri cikin addu'a.

Kuma wannan mas'alar don ita nayi takaitaccen rubutun nan nawa, saboda na tunatar da 'daukacin musulmai shari'ar mahaliccinsu, da fatan kuma Allah ta'alah ya taimaki masu aukawa cikin wannan laifi, su gyara.

7-  Yana daga cikin wuce-gona-da-iri a cikin addu'a: Bawa ya nemi Allah ya la'anci muminai, ko ya musu addu'an tabewa, kaskanci wai don ransa ya baci, Said bn Jubair daga cikin salaf yana cewa:

"لا تدعوا على المؤمن والمؤمنة بالشر؛ اللهم اخزه، والْعَنْه، ونحو ذلك؛ فإنّ ذلك عدوان".

Yace saboda yin hakan wuce-gona-da-iri ne. Wani daga cikinsu kuma yace a lokacin da yake bayyana ma'anar ayar da nake rubutu don amsa tambayar da ta zo akanta:

"هم الذين يدعون على المؤمنين فيما لا يحل، فيقولون: اللهم اخزِهم، اللهم الْعَنْهم"

Wadanda Allah ta'alah ya bayyana mana cewa baya sonsu; wadanda su ke wuce gona-da-iri cikin addu'a sune: masu yi munanar addu'a ga muminai; Allah ka tozarta su, su ce: Allah ka la'ance su. Don haka wannan nau'in ma ya shiga cikin wuce iyaka da aka hana a babin addu'a. Sai mu kula!

8-  Yana daga cikin wuce-gona-da-iri a cikin addu'a: Bawa ya yawaita maganan da ba a bukatar ta a lokacin addu'arsa, kamar yace ya Allah in ka shigar dani aljanna ka bani: farin-gida (white house), ta hanun damanta, Shi yasa wani daga cikin salaf da yaji 'dansa yana addu'a yana fadan irin haka sai ya kwabe shi, sannan ya gaya masa cewa Manzo (s a w) yace: Za a samu wassu da zasu rika wuce gona-da-iri a cikin addu'a da tsarki, A hir dinka ka kasance daga cikinsu! Kamar yadda Abu dawud [lamab: 96] ya rawaito shi, kuma hadisin ingantacce ne, Ga lafazinsa:

عَنْ أَبِي نَعَامَةَ أَنَّ عَبْدَ اللَّهِ بْنَ مُغَفَّلٍ سَمِعَ ابْنَهُ يَقُولُ: "اللَّهُمَّ إِنِّي أَسْأَلُكَ الْقَصْرَ الْأَبْيَضَ عَنْ يَمِينِ الْجَنَّةِ إِذَا دَخَلْتُهَا، فَقَالَ: أَيْ بُنَيَّ! سَلْ اللَّهَ الْجَنَّةَ، وَعُذْ بِهِ مِنْ النَّارِ؛ فَإِنِّي سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ: "سَيَكُونُ قَوْمٌ يَعْتَدُونَ فِي الدُّعَاءِ".

Don haka; abinda ake bukata ka nemi shiga aljanna, da kuma tsari daga fadawa wuta.

9-  Yana daga cikin wuce-gona-da-iri a cikin addu'a: Bawa ya rika daga sauti a cikin addu'arsa, shi yasa yazo a cikin ayar cewa: Ku roki Allah a boye; lallai Allah baya son masu wuce iyaka, Abdulmalik bn Abdul'aziz bn Juraij yace: "Lallai a cikin addu'a akwai wuce iyaka: An ki daga sauti, ihu da hauragiya a cikin addu'a, ana kuma umurni da Kankan-da-kai, da kuma nitsuwa, Ga lafazin nasa a larabce:

(إنّ من الدعاء اعتداء: يكره رفع الصوت والنداءُ والصياحُ بالدعاء، ويؤمر بالتضرع والاستكانة).

Daga karshe: Wannan wassu ne daga cikin nau'ukan wuce gona-da-iri, da ketare iyakar shari'a a babin addu'a, akwai kuma wassu nau'ukan da ban Ambato su ba; saboda duk wani saba wa turbar manzon Allah (s a w) cikin addu'oi, da kuma nisantar shiriyarsa yana fadawa cikin: I'ITIDA' A ADDU'A. Don haka wajibi ne mu san yaya Manzon Allah (s a w) yake addu'arsa don mu kubuta daga fadawa cikin ketare haddin musulunci.

Kuma –in sha Allah- makala ta gaba in da rai da lafiya za ta kasance ne da taken: WASSU DAGA CIKIN SHIRIYAR MANZON ALLAH (S A W) A BABIN ZIKIRI DA ADDU'OI.

Rubutawar

Abubakar Hamza

03/02/2012m