فضل صلاة الجماعة وحكمها

FALALAR SALLAR JAM'I DA HUKUNCINTA

Bismillahir rahmanir rahim!

Tambaya:

Menene hukuncin yin sallah a cikin "jam'i" (sunna ne ko wajiba), menene kuma falalarta?

Amsa:

Gabatarwa: Lallai yin sallar    jam'i a masallatai abu ne mai girma da Musulunci ya zo da shi, saboda shi da kuma aiwatar da  kiran sallah suna nuni kan samuwar Musulunci a gari, kuma dukkan musulmai sun yi ''ittifaqi'' cewa yin salloli biyar a masallatai na daga cikin manya-manyan fiskoki na xa'a ma Allahu ta'alah; kuma sananne ne cewa Allah ya shar'anta ma wannan al'ummar haxuwa a cikin wassu lokuta sanannu; daga cikinsu akwai: lokutan salloli guda biyar, da sallar juma'a, da idin azumi dana laiya, da sallar kisfewar rana ko wata. Kuma mafi girman haxuwa da musulmai ke yi, wanda kuma ya fi muhimmanci, shine: haxuwa a filin arafah a hajji; Kuma an shar'anta waxannan tarukan a Musulunci; saboda maslahohin musulmai; saboda a cikin waxannan tarurrukan akwai: saduwa a tsakaninsu, da qoqarin sanin sashinsu ga halayya ko matsalolin da 'yan'uwansu suke ciki, tare da banbancin al'ummansu da kabilunsu; kamar yadda Allah maxaukaki ya ke cewa:

{يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ} [الحجرات: 13].

Ma'ana: (Ya ku mutane lallai mune muka halicce ku daga namiji da mace, kuma muka sanya ku a matsayin al'ummomi da qabilu domin ku san juna, lallai mafi karamarku a wajen Allah shine wanda ya fi ku taqawa) [Hujuraat: 13].

Amma dangane da falalar sallar jam'i kuma: To haqiqa annabi (SALLALLAHU ALAIHI WASALLAMA) ya kwaxaitar akan sallar jam'i, ya kuma bayyana falalarta, da girman ladanta; a inda ya ke cewa: 

"صَلاَةُ الْجَمَاعَةِ أفْضُلُ من صَلاَةَ الْفَذِّ بِسَبْعٍ وَعِشْرِينَ دَرَجَةً" ([1]).

Ma'ana: (Sallar jam'i ta fi falala akan sallar mutum shi kaxai, da daraja ashirin da bakwai). Annabi (SALLALLAHU ALAIHI WASALLAMA) ya sake cewa:

"صَلاَةُ الرَّجُلِ فِي الْجَمَاعَةِ تُضَعَّفُ عَلَى صَلاَتِهِ فِي بَـيْتِهِ وَفِي سُوقِهِ خَمْسًا وَعِشْرِينَ ضِـعْفًا؛ وَذَلِكَ أَنَّهُ

إِذَا تَـوَضَّأَ فَأَحْسَنَ الْـوُضُوءَ، ثُمَّ خَرَجَ إِلَى الْـمَسْجِدِ لاَ يُـخْرِجُهُ إِلاَّ الـصَّـلاَةُ: لَمْ يَخْطُ خَطْوَةً إِلاَّ رُفِعَتْ

لَهُ بِهَا دَرَجَةٌ، وَحُطَّ عَنْهُ بِهَا خَطِيئَةٌ، فَإِذَا صَلَّى لَمْ تَزَلِ الْـمَلاَئِكَـةُ تُصَلِّي عَلَيْهِ مَا دَامَ فِي مُصَلاَّه..." ([2]).

Ma'ana: (Sallar mutum a cikin jama'a ana nin-ninkata a kan sallarsa a gidansa, da kuma a wajen kasuwancinsa: ninki ashirin da biyar; saboda idan bawa ya yi alwala, ya kuma kyautata alwala, kana ya fita i zuwa masallaci; ba abinda ya fitar da shi sai ita sallar: Ba zai taka wani taku ba; face an xaga darajarsa da ita, a kuma kankare masa kura-kurensa da ita, Idan kuma ya yi sallah: To mala'iku ba za su gushe ba suna yi masa addu'a, matuqar bai gushe ba a wurin sallarsa… -har qarshen hadisin).

Amma dangane da hukuncin yin sallah a "jama'a" kuma: Lallai sallar jam'i ''wajibi'' ce a salloli biyar, kuma "alqur'ani" da ''sunna'' sun yi nuni akan wajabcinta, Dalili daga alqur'ani shi ne faxin Allah maxaukakin sarki:

{وَإِذَا كُنْتَ فِيهِمْ فَأَقَمْتَ لَهُمُ الصَّلَاةَ فَلْتَقُمْ طَائِفَةٌ مِنْهُمْ مَعَكَ} [النساء: 102].

Ma'ana: (Idan ka kasance a cikinsu sai ka tsayar musu da sallah: to sai wani vangare daga cikinsu su tsaya tare da kai) [Nisa'i: 102].

Qa'idar musulunci tana nuna cewa: asali ga umurnin Allah shi ne "wajabci", kuma idan yin sallah a cikin jam'i ya zamto wajibi a hali na tsoro; (lokacin yaqi): To in ana cikin aminci; babu yaqi lamarin wajabcin sallar jam'i yafi zama wajibi.

Amma dalilai kuma daga "hadisai" sune: Na farko: Hadisin Abu-hurairah (RA), ya ce, annabi (SALLALLAHU ALAIHI WASALLAMA) yace:

"أَثْقَلَ الصَّلاةِ عَلَى الْـمُنَافِقِينَ صَلاةُ الْعِشَاءِ وَصَلاةُ الْفَجْرِ ، وَلَوْ يَعْلَمُونَ مَا فِيهِمَا لأَتَـوْهُـمَا وَلَوْ حَبْوًا، ولَقَدْ هَمَمْتُ أَنْ آمُرَ بِالصَّلاةِ فَـتُقَامَ، ثُمَّ آمُرَ رَجُلا يُصَلِّي بِالـنَّاسِ، ثُمَّ أَنْـطَـلِقَ مَعِي بِرِجَالٍ مَعَهُمْ حُزُمُ من حَطَب إِلَى قَوْمٍ لا يشهدون الصَّلاة، فَأُحَرِّقَ عَلَيْهِمْ بُيُوتَهُمْ بِالنَّار" ([3]).

Ma'ana: (Sallar da ta fi nauyi akan munafikai sune sallar ishah data asubah, da matune sun san abinda ke cikinsu na lada da sun zo musu koda kuwa da ja-gindi, kuma haqiqa na yi niyyar na yi umurni a tsayar da sallah, kana kuma na umurci wani ya jagoranci mutane sallah, sa'annan na tafi –tare da wassu mazaje, a tare da su akwai dami-damin itace- zuwa ga mutanen da basa halartar sallar jam'i; don na qona gidajensu akansu).

Wannan hadisin na nuna cewa sallah a cikin jam'i wajibi ne; saboda kasancewar annabi (SALLALLAHU ALAIHI WASALLAMA) da farkon fari: ya siffanta waxanda su ke qin halartarta da cewa su "munafiqai" ne, saboda mutumin da ya qaurace ma abinda shi ke "sunnah" ba za a qirga shi a matsayin "munafiqi" ba; sai wannan ya yi nuni cewa waxannan mutanen sun kauracewa "abu" na ''wajibi''. Na biyu: Annabi (SALLALLAHU ALAIHI WASALLAMA) ya yi nufin yin horo ga waxanda basa halartar sallar jam'i; sananne ne kuma shi "uquba –horo-'' ba ya kasancewa sai in an bar abu na wajibi, kuma abinda ya hana annabi (saw) zartar da wannan "uqubar" shine kasancewar ba wanda ke uquba da wuta sai Allah -mabuwayi da xaukaka-.

Wassu maluma kuma suka ce: dalilin hanuwarsa kan qone su shine abinda ke cikin waxannan gidajen; na mata da zurriya waxanda sallar jama'a ba wajibi ba ce akansu.

** Yana cikin dalilai da suke nuna wajabcin sallar jam'i: Qissar sahabin nan makaho wanda bashi da jagora; wato: Abdullahi bn Ummi maktum (ra) a lokacin da ya nemi izinin Annabi (saw) kan ya riqa yin sallah a gidansa; saboda kasancewarsa makaho, wanda kuma gidansa ke nesa da masallaci, Sai annabi (saw) ya masa rangwame, yayin da ya juya zai tafi sai ya kira shi, ya ce da shi:

«هَلْ تَسْمَعُ النِّدَاءَ بِالصَّلَاةِ؟» قَالَ: نَعَمْ، قَالَ: «فَأَجِبْ»([4]).

Ma'ana: "Shin in an yi kiran sallah kana ji? Sai ya ce: E, Sai ya ce: To ka amsa".

A wata riwayah kuma:

«لاَ أَجِدُ لَكَ رُخْصَةً»([5]).

Ma'ana: "Ban sama maka wani rangwame ba".

*** Da kuma saboda abinda ya zo da isnadi hasan, daga Abdullahi dan Abbas (ra) lallai annabi (saw) ya ce:

"مَنْ سَمِعَ النِّدَاءَ فَلَمْ يُجِبْ فلا صلاة له إلا من عذر" ([6]).

Ma'ana: (Duk wanda ya ji kiran sallah sai kuma bai amsa ba, to ba shi da sallah; sai dai in yana da uzuri).

**** Ya zo kuma a cikin littafin "sahihu Muslim" daga Abdullahi xan Mas'ud (ra) ya ce:

«مَنْ سَرَّهُ أَنْ يَلْقَى اللهَ غَدًا مُسْلِمًا، فَلْيُحَافِظْ عَلَى هَؤُلَاءِ الصَّلَوَاتِ حَيْثُ يُنَادَى بِهِنَّ، فَإِنَّ اللهَ شَرَعَ لِنَبِيِّكُمْ صَلَّى اللهُ عَلَيْهِ وَسَلَّمَ سُنَنَ الْهُدَى، وَإِنَّهُنَّ مَنْ سُنَنَ الْهُدَى، وَلَوْ أَنَّكُمْ صَلَّيْتُمْ فِي بُيُوتِكُمْ كَمَا يُصَلِّي هَذَا الْمُتَخَلِّفُ فِي بَيْتِهِ، لَتَرَكْتُمْ سُنَّةَ نَبِيِّكُمْ، وَلَوْ تَرَكْتُمْ سُنَّةَ نَبِيِّكُمْ لَضَلَلْتُمْ، وَمَا مِنْ رَجُلٍ يَتَطَهَّرُ فَيُحْسِنُ الطُّهُورَ، ثُمَّ يَعْمِدُ إِلَى مَسْجِدٍ مِنْ هَذِهِ الْمَسَاجِدِ، إِلَّا كَتَبَ اللهُ لَهُ بِكُلِّ خَطْوَةٍ يَخْطُوهَا حَسَنَةً، وَيَرْفَعُهُ بِهَا دَرَجَةً، وَيَحُطُّ عَنْهُ بِهَا سَيِّئَةً، وَلَقَدْ رَأَيْتُنَا وَمَا يَتَخَلَّفُ عَنْهَا إِلَّا مُنَافِقٌ مَعْلُومُ النِّفَاقِ، وَلَقَدْ كَانَ الرَّجُلُ يُؤْتَى بِهِ يُهَادَى بَيْنَ الرَّجُلَيْنِ حَتَّى يُقَامَ فِي الصَّفِّ»([7]).

Ma'ana: "Duk wanda zai faranta masa rai cewa ya haxu da Allah a gobe kiyama, yana musulmi to ya kiyaye waxannan sallolin a lokacin da ake kiranSu, saboda lallai Allah ya shar'anta ma annabinsa (saw) hanyoyin shiriya, kuma lallai waxannan sallolin suna daga hanyoyin shiriya, kuma da dukkanku za ku yi sallah a cikin gidaddajinku kamar yadda wannan mai qin zuwa masallaci ke sallah a cikin gidansa da kun bar sunnar annabinku, da kuma za ku bar sunnar annabinku da kun vace. Kuma babu wani mutum da zai yi tsarki sai ya kyautata tsarkinsa, sannan sai ya nufi wani masallaci daga cikin masallatai face Allah ta'alah ya rubuta masa da kowani taku da ya yi tattaki lada mai kyau, ya kuma xaga darajarsa da ita, ya kuma kankare masa mummuna da ita. Kuma na ganmu (a zamanin sahabbai) babu wanda ke qin halartar jam'i face munafikin da ya sanu da munafurcinsa. Kuma haqiqa mutum ya kasance ana daddafe da shi (saboda rashin lafiya) a tsakanin mutum biyu, har a tsayar da shi a cikin sahu".

Dangane da munafikai kuma dama Allah ta'alah ya siffatasu da cewa:

{وَإِذَا قَامُوا إِلَى الصَّلاةِ قَامُوا كُسَالَى يُرَاءُونَ النَّاسَ} [النِّسَاء: 142]،

Ma'ana: "Basa zuwa sallah face suna kasalallu" [Nisa'i: 142].

Ya kuma sake cewa:

{وَلا يَأْتُونَ الصَّلاةَ إِلا وَهُمْ كُسَالَى ...} [التَّوْبَة: 54]

Ma'ana: "Kuma basa zuwa sallah face suna cikin kasala" [Taubah: 54].

Kuma lallai ita "sallar jama'a" a masallaci wajibi ce akan maza; banda mata da kuma yaran da basu riga suka balaga ba; Wannan kuma saboda faxinsa (SALLALLAHU ALAIHI WASALLAMA) dangane da mata:

"وَبُيُوتُهُنَّ خَيْرٌ لَهُن" ([8]).

Ma'ana: (Kuma dakunansu shi ya fiye musu alkhairi).

Amma kuma babu laifi idan mata suka halarci "sallar jam'i" a masallatai, tare da lulluvi, da kiyaye kai, da kuma amintuwa daga fitina da fitinuwa, kuma baya dacewa ga mijinta ya hana ta; idan ta nemi izininsa don zuwa ga masallaci.

Duk kuma mutumin da ya bar yin sallah a cikin jam'i; ya je ya yi sallarsa shi kaxai ba tare da uzuri ba: to sallarsa ta inganta, sai dai kuma ya aikata savo; sakamakon barin "wajibi".

A dunkule: Kula da salloli guda biyar a cikin jam'i kamar yadda Allah ya yi umurni da haka a cikin littafinsa, da kuma a harshen manzonsa (saw) wajibi ne akan Mutane.

Amma abun da mutane da dama ke aikatawa a yau, Na yin salloli a cikin gidaje, da kuma kyale masallatai, to wannan kuskure ne da ya sava ma dalilan shari'a da ambatonsu ya gabata,  kuma wajibi ne su hanu daga aikata haka, tare da umurtarsu da kiyaye salloli, a cikin masallatai.

Allah ne masani!

Abubakar Hamza

15/04/1436h daidai 04/02/2015

&&&&

---

([1]) Bukhariy ya rawaito shi, (lamba: 645, 646), da Muslim (lamba:  650). 

([2]) Bukhariy ya rawaito shi, (lamba: 647). 

([3]) Bukhariy ya rawaito shi, (lamba: 644), da Muslim (lamba:  651). 

([4])  Muslim ne ya rawaito shi daga hadisin Abu-hurairah (ra), (lamba: 653).

([5])  Abu-dawud ya rawaito shi (lamba: 552), da Ibnu-maajah (lamba: 792).

([6]) Abu-dawud ya rawaito shi, (lamba: 551), da Ibnu-majah, (lamba: 793), da Alhakim (1/ 245), kuma ya inganta shi, ya ce a kan sharaxin Bukhariy da Muslim, Albaniy shima ya inganta shi (Sahihu Ibni-majah, lamba: 645). 

([7])  Muslim ya rawaito shi (lamba: 654).

([8]) Abu-dawud ya rawaito shi, (lamba: 567), da Ahmad (2/ 76), da Alhakim (1/ 209), ya kuma inganta shi, Azzahabiy kuma ya masa "muwafaqah", Albaniy shima ya inganta shi (Irwa'u algalil, lamba: 515).