HUDUBAR MASALLACIN ANNABI 23 Ramadana 1439 ta Dr Huzaifiy daidai 8Yuni2018

HUDUBAR MASALLACIN ANNABI

(صلى الله عليه وسلم)

JUMA'A, 23/Ramadhana/1439H

daidai da 08/Yuni/ 2018M

LIMAMI MAI HUDUBA

SHEIKH ALIYU BN ABDURRAHMAN ALHUZAIFIY

TARJAMAR

ABUBAKAR HAMZA

YIN HISABI GA RAI A CIKIN WATAN RAMADHANA, DA NI'IMAR ALKUR'ANI

Shehin Malami wato: Aliyu bn Abdurrahman Alhuzaifiy –Allah ya kiyaye shi- ya yi hudubar juma'a mai taken: YIN HISABI GA RAI A CIKIN WATAN RAMADHANA, DA NI'IMAR ALKUR'ANI, Wanda kuma a cikinta ya tattauna, akan abinda ke tafe, Ya ce:

بسم الله الرحمن الرحيم

HUDUBAR FARKO

Yabo na Allah ne; Ubangijin kasa da sammai, Ma'abucin ni'imomi da albarkoki,

Ayyukan da'a basu amfanar da shi, kuma munana basu cutar da shi, kawai suna amfanar ko su cutar da wanda ya aikata su ne, saboda Allah Wadatacce ne baya bukatar halittu,

Ina yin yabo ga Ubangijina kuma ina gode masa akan ni'imominSa wadanda muke sani, da wadanda bamu sani ba, saboda yabo da godiya nasa ne a cikin dukkan halaye

Kuma ina shaidawa babu abin bautawa da gaskiya sai Allah; shi kadai ya ke, bashi da abokin tarayya, Yana da sunaye mafiya kyau, da mafi girman sifofi.

Ina kuma shaidawa lallai annabinmu kuma shugabanmu Muhammadu bawanSa ne manzonSa, wanda ake karfafarsa da hujjoji da kuma mu'ujizozi.

Ya Allah ka yi dadin salati da sallama da albarka ga bawanka kuma manzonka Muhammadu, da IyalanSa da SahabbanSa masu gaggawar aikata alkhairori

Bayan haka;

Ku kiyaye dokokin Allah Mabuwayi da daukaka ta hanyar ayyukan da suke yardarm da shi, da nisantar fushinSa da sabonSa, saboda babu mai samu rabo sai masu takawa. Kuma babu mai yin hasara face mujirimai.

Ya ku musulmai …

Yin hisabi ga Rai, da kokarin yin ayyukan da'a, da neman kara kyawawan ayyuka, da kiyaye abinda Allah ya taimaki bawanSa ya masa taufikin dace; na daga ayyuka nagari, da nisantar lamuran da suke bata ayyukan da'oi = sune hakikanin samun rabo da tsira a cikin wannan rayuwar, da kuma bayan mutuwa; Allah Ta'alah ya ce: "Amma wanda ya ji tsoron tsayuwar gaban UbangijinSa, sai ya kange ransa daga son Rai * to lallai Aljannah ita ce makoma" [40-41].

Kuma Allah Mabuwayi da daukaka ya ce dangane da ma'abuta Aljanna: "Sai sashensu ya fiskanci sashe suna tambayar juna * suka ce: Lallai mu, mun kasance a gabanin wannan (a Duniya), a cikin iyalanmu munan jin tsoro * Sai Allah yay i mana kyauta falala, kuma ya tsare mu daga azabar iskar zafi" [Dur: 25-27].

Kuma Allah ya ce: "Ya ku wadanda suka yi imani ku yi da'a ga Allah, kuma ku yi da'a ga ManzonSa, kuma kada ku bata ayyukanku" [Muhammadu: 33].

Ibnu-kasir –Allah ya yi masa rahama- yake fada dangane da tafsirin fadinSa Allah Ta'alah: "Kuma Rai ta yi dubi kan abinda ta aikata don gobe" [Hashr: 18], Ma'ana: Ku yi hisabi ga rayukanku gabanin a muku hisabi, kuma ku yi dubi kan abinda kuka yi tanadi ga kayukanku na kyawawan ayyuka, domin ranar da za a dawo da ku, kuma a bijiro da ku ga Ubangijinku. maganarsa ta kare.

Kuma Annabi –صلى الله عليه وسلم- ya ce: : "Mai hankali shine wanda ya yi hisabi ga kansa, sannan ya yi aiki domin abinda zai kasance a bayan mutuwa. Gajiyayye kuma shine wanda ya biye wa son zuciyarsa; sai yake ta kwallafa buri ga Allah".

Kamar yadda TABEWA DA HASARAR RAYUWA YAKE CIKIN BIN SOYE-SOYEN ZUCIYA, DA AIKATA HARAMUN, DA BARIN AYYUKAN DA'A, KO AUKAWA CIKIN ABABEN DA SUKE RUGUZA KYAWAWAN AYYUKA, kuma lallai, ya ishi mutum sharri, ya rika aikata abunda zai tauye masa ladansa!

Ya ku Musulmai…

Lallai kuna ganin saurin tafiyan darare da yini, da yadda shekaru suke ta wucewa, Kuma lallai duk yinin da ya shude, to lallai ya tafi da abinda aka yi a cikinsa; ba zai dawo ba.

Kuma rayuwa gaba dayanta ba komai b ace, face wasu darare da yini, sai ajalin bawa ya sauka a gare shi, aikinsa ya yanke, sai kuma ya samu yakini akan yadda guri ya rude shi.

Kuma hakika mafi yawan kwanakin watan alkhairori (na Ramadana) sun shige, Sai wasu darare da yini madaukaka a cikin watan suka saura, da awoyi masu daraja; Don haka:

Duk wanda ya kyautata ayyuka, to yayi godiya ga Allahn da ya taimake shi, ya masa dace a cikinsu, sai kuma ya kiyaye ayyukansa daga abubuwan suke bata su, ko kuma rage musu lada, da aukawa a cikin ukubobi, sai kuma bi aikin kyautatawa da aikin da yafi shi kyau, Allah Ta'alah ya ce: "Ba komai ba ne sakamakon kyautatawa, face kyautatawa" [Arrahman: 60].

Wanda shi kuma ya kasance ya yi sakaci, to sai ya zage damtse wajen kara kokari, ya zabura wajen aiki da nau'ukan ibadodi da dangogin da'oi, domin ya tottoshe abinda yay i na sakaci; saboda ayyuka suna kara samun tagomashi ne da abinda aka cike su, daren Lailatul kadari kuma har yanzu ana fatan dacewa da ita, su kuma zunubai da rahamar Allah Mabuwayi da daukaka da gafararSa, da hakurinSa da karramawarSa da yafiyarSa ababen gogewa ne. kuma ya zo cikin hadisi cewa: : "Wanda ya yi tsayuwar daren Lailatul kadari (yana salla) cikin imani da neman lada, to an gafarta masa abinda ya gabata daga zunubansa", Bukhariy da Muslim suka ruwaito shi, daga hadisin Abu-hurairah –رضي الله عنه-.

Allah Ta'alah ya ce: : "Daren Lailatul kadari tafi alheri fiye da watanni dubu" [kadr: 3]. Maluman tafsiri suka ce: Ma'ana yin bauta a cikinta yafi falala akan bautar watanni dubu; wadanda babu Lailatul kadari a cikinsu; Abu-Mus'ab; wato Ahmad bn Abubakar Azzuhuriy yace: Malik ya bamu labara, cewa: lallai labara ya same shi, cewa lallai Manzon Allah –صلى الله عليه وسلم- an nuna masa shekarun mutanen da suka rigaye shi, sai ya yi kamar ya raina shekarun al'ummarsa, saboda tsoron ba za su iya aikin da wasunsu suka yi ba; sakamakon tsawon shekarunsu, Amma sai Allah ya bashi daren lailatul kadari, wanda yafi watanni dubu alkhairi.  

Kuma yana daga cikin hikimomin Allah masu kololuwan girma, da rahamarSa mai fadi, da falarSa mai yalwa da girma, Yadda ya farlanta azumin watan Ramadhana ga al'ummar Musulmai, wato, watan da aka saukar da Alkur'ani Mai girma a cikinsa.

Shi kuma Manzon Allah –صلى الله عليه وسلم- ya sunnanta mana yin salloli a cikin dararen watan, kuma ya kwadaitar akan hakan, a inda ya ce: : "Wanda yayi salloli da tsayuwan dararen watan Ramadhana, an gafarta masa abinda ya gabata dagab zunubansa", Bukhariy da Muslim suka ruwaito shi, daga hadisin Abu-hurairah.

Kuma Alkur'ani da sunnah, sun kwadaitar akan nau'ukan ayyukan biyayya ga Allah gaba dayansu, a cikin wannan wata mai albarka, ta hanyar farlanta azumtarsa, da kwadaitarwa kan yin salloli a cikin darensa, da kwadaitarwa kan aikata alkhairori, n agodiya wa Allah Ta'alah akan ni'imar saukar Alkur'ani mai girma, wanda Allah ya saukar da shi, domin ya zama jin-kai ga talikai, saboda Kur'ani shine mafi girman ni'ima kuma baiwar da tafi daukaka, wanda ruhi ke rayuwa da shi, saboda shine farkon ni'imar da aka yi ga ruhi ga al'ummar Musulunci, bayansa kuma sai ni'imar imani, saboda duk mutumin da Allah Ta'alah ya masa ni'imar imani daga cikin wannan al'ummar, to hakika an hada masa ni'ima ta farko mai gamewa, wanda shine Alkur'ani mai girma, da ni'ima ta farko wanda ta kebanta da shi, wanda kuma shine ni'imar imani.

Kuma yana cikin hakkokin ni'imar Kur'ani mai girma, da kuma hakkin ni'imar imani, Yin godiya ga Allah Mabuwayi da daukaka    

Kuma su; azumi da salloli ko tsayuwar dararen Ramadhana, da nau'ukan da'oi, godiya ne ga Allah  Ta'alah akan ni'imominSa, kuma ayyukan samun kusanci ne zuwa gare shi.

Su ni'imomi hakkinsu da abinda suke wajabtawa, shine ayi godiya ga Allah; ta hanyar aiki da zance, da nuna soyayya ga Mai bada ni'imomi (wato, Allah) Mabuwayi da daukaka, Allah Ta'alah  yana cewa: "Lallai ne mu, mun yi maka kyauta mai yawa" [kausar: 1]. Abinda ake nufi da "kausar" shine alheri mai fadi mai albarka, wanda baya yankewa, wanda kuma daga cikinsa akwai tafkin alkausara.

Sai Allah –a cikin wannan surar- ya shiryar da ManzonSa annabi Muhammadu zuwa ga tsayuwa da hakkin Allah Ta'alah, ta hanyar yin salla da makamancinta daga cikin ibadodi, domin ya kyautata wa kansa, kuma hakika Annabi –صلى الله عليه وسلم- ya cika dukkan matakan bauta ta hanyar bada hakkokinsu, kuma ya tsayu da haka cikakken tsayawa. Sa'annan sai Allah ya shiryar da AnnabinSa –صلى الله عليه وسلم- zuwa ga kyautata wa halittu, ta hanyar ciyarwa da gamammen amfanarwa. Kuma hakika Annabinmu ya yi aiki da hakan.

Wannan misali ne na godiyar Annabinmu –صلى الله عليه وسلم- akan ni'imomi.

Kuma Allah Ta'alah ya ce: "Kuma, ga Allah ne kadai zaka yi bauta, kuma ka kasance daga masu godiya" [Zumar: 66]. Sai Annabi –صلى الله عليه وسلم- yake cewa A'isha –Allah ya kara yarda a gare ta-, a lokacin da take cewa, Ka ke yin salloli har kafofinka suke kumbura? Alhalin Allah ya gafarta maka abinda ya gabata daga zunubanka da abinda ya jinkirta?? "Shin ba zan kasance, Bawa mai godiya ba", Bukhariy da Muslim suka ruwaito shi.

Kuma Allah Ta'alah ya ce: "Ku aikata godiya –Ya ku diyan dawuda-, kuma kadan ne mai godiya daga cikin bayina" [Saba'i: 13].

Kuma Allah Ta'alah yake fada dangane da annabi Musa –عليه الصلاة والسلام-: "Ka riko da abinda ba baka, kuma ka kasance daga cikin masu godiya" [A'araf: 144].

Kuma a lokacin da Allah ya ambaci ni'imominSa da ya yi wa Maryama –عليها السلام- sai ya ce: "Ya Maryamu! Ki yi Kankan-da-kai ga Ubangijinki, kuma ki yi sujada, kuma ki yi ruku'i tare da masu ruku'i" [Ali-imrana: 43].

Kuma Allah yake fada dangane da sahabbai –Allah ya kara yarda a gare su-: "Kana ganinsu suna masu ruku'I, masu sujada, suna neman falala daga Allah, da yardarSa. Alamarsu tana a cikin fuskokinsu na guraben sujada" [Fat-h: 29].

Don haka, ibadodi a cikin watan Ramadhana suna daga godiyar Allah akan ni'imar saukar da Alkur'ani mai girma.

Kuma Kur'ani mai karamci yana da karfin tasiri ga ruhi, a cikin watan Ramadhana, domin yana shiryar da ruhi zuwa ga dukkan alkhairi, kuma ya tsawatar da ita daga aikata kowane sharri; domin a yayin da rai mai umarni da aikata munana take zama ta yi rauni saboda azumin da take yi, to sai ruhi kuma ya samu abincinsa a cikin Alkur'ani, sai ya gyaru.

Sai ka jarraba kanka da kanka –Ya kai Musulmi- shin ka tuba zuwa ga Allah a cikin watan Ramadhana?

Shin a cikin watan Ramadhana, ka yi aiki domin abinda zai kasance a bayan mutuwa?

Shin ka mayar da ababen da ka zalunta ga ma'abutansu, gabanin zuwan lokacin hisabi?

Shin ka kame sharrinka, ga barin halittu?

Shin ka kyautata wa halittu?

Shin ka sadar da zumuncinka?

Shin ka yi biyayya ga iyayenka?

Shin ka yi umarni da kyakkyawan aiki, ka yi hani kan mummuna?

Shin ka dena cin riba, da dukiyoyin haramun?

Shin ka yi kokarin koyi da Manzon Allah –صلى الله عليه وسلم- da sahabbanSa –Allah ya kara yarda a gare su-, da da wadanda suka bi su, da kyautatawa, cikin tsarkin ruhi, da mikakkun dabi'u, da karuwar imani, da karfin yakini, da ma'anoni madaukaka wadanda suka yi dacen samunsu a cikin watan Ramadhana?

Ka karanta littafinka –Ya kai Musulmi- tun a nan duniya, gabanin a lahira ce maka: "Ka karanta littafinka, domin a yau, Ranka ta isa ta zama mai hisabi akanka", [Isra'i: 14].

Alkur'ani mai girma shine babbar ni'imar da Allah ya saukar da ita a cikin watan Ramadhana.

Kuma lallai babu abinda zai gyara halin da musulmai suke ciki face Alkur'ani da sunnah. Kuma da masu hikimar Duniya za su hadu gaba dayansu, daga farkonsu har na karshensu,da rayayyunsu da matattunsu, domin warware matsala daya daga cikin matsalolin duniya, to lallai da ba za su samu hanyar hakan ba, sai ta hanyar Alkur'ani mai girma.

Ka dubi MAS'ALAR AKIDA KAN ALLAH TA'ALAH DA SUNAYENSA DA SIFOFINSA DA AYYUKANSA, DA HAKKINSA DA YAKE DA SU AKAN BAYINSA; Kay i dubi, akidu nawa ne a wannan mas'alar? Za ka samu ba za su iya kididdiguwa ko kirguwa ba?

Kuma gaskiya a cikin wannan mas'alar tana cikin abinda Alkur'ani mai karamci.

Kuma matsalar TATTALIN ARZIKI a Duniya itama ta gagari masu hikima, kuma gaskiya a cikinta shine abinda Kur'ani da sunnah suka fada akanta.

Wasu wadanda ba musulmai ba, sun amfana da shari'ar musulunci a cikin irin wannan lamari, a cikin wasu kofofin.

Kuma ba zai yiwu mutane gaba dayansu su kasance musulmai ba. Sai dai kuma wajibi ne akan musulmai suyi riko da Alkur'ani da sunnah, har idan sauran mutane suka ga abin koyi mai kyau, daga kowane musulmi, to sais u amfana da su, koda kuwa cikin lamuransu na duniya ne.

Kuma dukkan diyan-Adamu masu kuskure ne, saidai mafiya alherin masu kuskure sune masu tuba.

Allah Ta'alah yana cewa: "Lallai ne wannan Alkur'anin yana shiryarwa zuwa hanyar da tafi mikewa, kuma yana yin albishir ga muminai wadanda suke aikata ayyuka kwarai, cewa: Lallai ne suna da lada mai girma" [Isra'i:9].

Allah ya yi mini albarka NI da KU, cikin alkur'ani mai girma, ya kuma amfanar da NI da KU da abinda ke cikinsa na ayoyi, da tunatarwa mai hikima,      Na faxi abinda ku ka ji, kuma ina neman gafarar Allah mai girma ga Ni da KU da kuma sauran Musulmai daga kowani zunubi, Ku nemi gafararSa,    lallai shi Mai gafara ne Mai rahama.

,,,          ,,,          ,,,

,,,          ,,,          ,,,

HUDUBA TA BIYU

        Yabo ya tabbata ga Allah Ubangijin talikai, Ina yin yabo ga Ubangijina, kuma ina gode masa,

Kuma ina shaidawa babu abin bautawa da gaskiya sai Allah; shi kadai ya ke bashi da abokin tarayya, Mai matsanancin karfi,

Kuma ina shaidawa lallai annabinmu kuma shugabanmu Muhammadu bawansa ne manzonsa, amintacce,

Ya Allah ka yi dadin salati da sallama ga bawanka kuma manzonka Muhammadu, da iyalansa, da sahabbansa gaba daya.

Bayan haka … !!

Sai ku yi takawar Allah Ta'alah, kuma ku nemi kusanci da shi da aikata abinda ya yi umarni, da kuma nisantar abinda ya yi hani kuma ya tsawatar, Allah Ta'alah ya ce: "Lallai hakika wanda ya tsarkaka (da imani) ya samu babban rabo * Kuma ya ambaci sunan UbangijinSa, sa'annan ya yi salla" [A'alah: 14-15].

An ruwaito daga Umar bn Abdul'aziz, lallai shi ya kasance yana umartar Mutane do su fitar da zakkar fidr, sai ya karanta wannan ayar.

Kuma zakkar fidda-kai wajibi ce akan kowane musulmi, saboda an ruwaito daga Abu-Sa'id –رضي الله عنه- ya ce: "Manzon Allah –صلى الله عليه وسلم- ya farlanta zakkar fidira, sa'in alkama, ko sa'in sha'ir, ko sa'i na dabino, ko sa'i na cukui, ko sa'i na zabib; wato busasshen inabi".

Kuma gwargwadon sa'iy shine kilo uku in banda 'dan kadan, sai dai bayar da kilo uku shine yafi tsantseni (da fita daga sabani).

Kuma yana wadatarwa a fitar daga abincin mutanen gari.

Kuma ana bayar da ita ga karami dabba, da namiji da mace.

Kuma ya halatta a fitar da ita gabanin idi da yini daya, ko biyu.

Kuma ta kan kasance tsarkaka ne, ga mai azumi daga wargi, kuma tana zama toshiya ga abinda aka samu na sakaci.

Kuma duk wanda ya bayar da ita gabanin fitarsa ga salla, to hakan yana cikin lokacinta.

Wanda kuma ya bayar da bayan idar da sallah, to sadaka ce daga cikin sadakoki.

        Ya ku Bayin Allah… !!!

        "Lallai ne, Allah da Mala'ikunsa suna yin salati ga wannan annabin, Ya ku waxanda suka yi imani, ku yi salati a gare shi, da sallama ta aminci" [Ahzab: 56].

Ya Allah! Ka yi salati da sallama wa Annabi Muhammadu.