HUDUBAR MASALLACIN ANNABI (صلى الله عليه وسلم) JUMA'A, 24 /JUMADAH AL'ULAH/1437H Daidai da 04 /Maris / 2016M Ta Dr. Abdulmuhsin Alkasim

HUXUBAR MASALLACIN ANNABI

 (صلى الله عليه وسلم)

JUMA'A, 24 /JUMADAH AL'ULAH/1437H

Daidai da 04 /Maris / 2016M

LIMAMI MAI HUXUBA

DR. ABDULMUHSIN XAN MUHAMMADU XAN ABDURRAHMAN ALQASIM

TARJAMAR

ABUBAKAR HAMZA
بسم الله الرحمن الرحيم

HUXUBAR FARKO

Lallai yabo na Allah ne; muna gode maSa, muna neman taimakonSa, muna neman gafararSa, kuma muna neman tsarin Allah daga sharrin kayukanmu, da munanan aiyukanmu.

Wanda Allah ya shiryar babu mai vatar da shi, Wanda kuma ya vatar to babu mai shiryar da shi.

Kuma ina shaidawa babu abin bautawa da gaskiya sai Allah; shi kaxai ya ke, bashi da abokin tarayya.

Ina kuma shaidawa lallai annabi Muhammadu bawanSa ne manzonSa ne.

Salatin Allah su qara tabbata a gare shi, da IyalanSa da SahabbanSa; da sallamar amintarwa mai yawa.

            Bayan haka;

Ku kiyaye dokokin Allah da taqawa -Ya ku bayin Allah- iyakar kiyayewa,   kuma ku yi riqo a Musulunci da igiya mai qarfi (amintacciya).

            Ya ku musulmai …

ILIMI yana samun xaukaka da xaukakar abinda ake neman a sani,  Lallai kuma maxaukakin ilimi da yafi tsarki shine: ILIMIN SANIN ALLAH, kuma buqatuwar bayi zuwa ga sanin Allah maxaukaki, da girmama shi: Sama yake da kowace buqata, hasali ma shine tushen dukkan abinda ake da lalurar samu.

Kuma Allah, Ya fitar da zuriyar Baniy-Adama daga tsatsonsu suna masu yin shaida a kansu cewa lallai Allah shine: UBANGIJINSU WANDA YA MALLAKE SU, kuma lallai BABU ABIN BAUTAWA DA GASKIYA SAI SHI. Allah (تعالى) yana cewa:

"Kuma a lokacin da Ubangijinka ya xauki alkawari daga Xiyan Adam, daga bayayyakinsu, a zuriyarsu, kuma ya shaidar da su a kan rayukansu, (Ya ce:) Shin ba Ni ne Ubangijinku ba? Suka ce: Na'am, Mun yi shaida !" [A'araaf: 172].

            Kuma lallai ne, ita zuciya an halitta ta ne don ta so Allah, saboda Allah ya qagi bayinSa a kan sonSa da saninSa, "Halittar Allah, da ya halitta Mutane a kanta, Babu musanyawa ga halittar Allah" [Rum: 30]. Ma'ana: Kada ku musanya halittar Allah, ta hanyar canzawa Mutane abinda aka halicce su a kai. Kuma wannan "Fixrar" ita ce: Miqaqqen addini (haniyfiyyah) wanda Allah ya halitta bayinSa akanta.

Kamar yadda Annabi (صلى الله عليه وسلم) ya ke cewa:

"Kowani abin haifuwa ana haifansa ne akan fixirar Musulunci".

Kuma Annabi ya bayyana cewa Shexanun cikin Aljanu da Mutane suna yin aikin jirkitata (fixrah), Allah yana faxa cikin HADISIN QUDUSIY: "Lallai ne Ni na halicci bayina akan miqaqqen addini gabaxayansu, kuma lallai ne Su Shexanu sun zo zuwa gare su, sai suka juya su daga addininsu", Muslim ya ruwaito shi.

            Kuma kowani Musulmi an umurce shi da ya riqa kula da fixirarsa ta addini; domin wacce ta karkace ta koma kan asalinta, waxanda suke da imani kuma su qara samun qarfin imani.

            Kuma lallai Allah ya tsayar da ayoyinSa don su zamo dalilai masu nuna RububiyyarSa da UluhiyyarSa, Kuma da ruwan Teku zai kasance tawadar alqaluman da za a rubuta kalmomin Allah da hukuncinSa da ayoyinSa, waxanda suke nuni zuwa gare shi, to, da sai ruwan Tekun ya qare, gabanin a gama rubuta hakan, kai koda an zo da wasu Tekunan waxanda za su riqa qara shi, ana yin rubutun da su, to da kalmomin Allah basu qare ba "Ka ce: Da teku ya kasance tawada ne ga rubutun kalmomin Ubangijina, lallai da ruwan tekun ya qare gabanin kalmomin Ubangijina su qare, kuma ko da mun zo da qarin kwatankwacinsa don qarawa" [Kahf: 109].

           

Su kuma Manzanni gabaxayansu, an turo su ne don tabbatar da abinda ya kimsu cikin fixirah, da qara kammala shi.

Kuma lallai ne Allah ya kafa hujja ga waxanda ba su kaxaita shi (cikin UluhiyyarSa) ba, da abinda suka tabbatar masa na RububiyyarSa, Allah (تعالى) yana cewa:

"Ya ku Mutane! Ku bauta wa Ubangijinku, wanda ya halicce ku, ku da waxanda suka zo gabaninku, domin ku samu taqawa (da kariya daga shiga azaba) " [Baqarah: 21].

Kuma lallai tauhidin "Rububiyyah"; ta hanyar kaxaita Allah cikin aiyukanSa dalili ne na kaxaitakar Allah cikin cancantar bautar bayinsa (wato: Uluhiyyah).  Kuma lallai "tauhidin Rububiyyah" ginshiqi ne daga cikin ginshiqan "imani", kuma xaya ne daga cikin nau'ukan tauhidi "guda uku", wanda saboda shi Allah (ta'alah) ya halicci bayi.

            Kuma yin shirka a cikin wannan tauhidin (na Rububiyya) shine nau'in shirkar da ta fi girma kuma tafi muni. Kuma babu wanda zai yi katovara a cikin "Uluhiyyah" sai wanda be baiwa (Tauhidin) Rububiyyah haqqinsa ba.

           

            Kuma lallai Allah yana da "kamala" a cikin dukkan "sifofinSa, da aiyukanSa". Kuma yana daga cikin SifofinSa –جل شأنه- Sifar RUBUBIYYAH; kuma bashi da abokin tarayya a cikinta, kamar yadda bashi da abokin tarayya a cikin "Uluhiyyah", Allah (تعالى) yana cewa:

"Ka ce: Shin wanin Allah nake neman ya zama Ubangiji, alhali shine Ubangijin dukkan komai" [An'am: 164].

            Shi kuma HAQIQANIN (tauhidin) RUBUBIYYAH shine: Kaxaitakar Allah (تعالى) cikin halitta, da mallaka, da azurtawa, da juya lamari, saboda shi Allah (maxaukaki) shine: Mahalicci; babu wani mahalicci a tare da shi, Allah (تعالى) yana cewa:

"Shin akwai wani Mahalicci baicin Allah; …" [Faxir: 3].

Kuma shine: Mai kyautata halittar Sammai da qassai; Wanda ya yi halitta sa'an nan ya daidaita abin halittar, Ya kuma kyautata dukkan abinda ya halitta, kuma Mai yawan halitta Masani. "Wannan shine halittar Allah, Sai ku nuna mini Menene waxannan da ba Shi ba suka halitta?" [Luqman: 11].

Kuma kamar yadda ya fari halitta, to Allah zai sake dawo da su ranar qiyamah, kuma sake dawo da su Shine yafi sauqi a gare shi.

            Kuma kowani abin bauta koma-bayan Allah bai cancanci bauta ba, saboda baya iya yin halitta, Allah (تعالى) yana cewa: "Lallai ne waxanda kuke bauta musu baicin Allah ba za su halitta quda ba, ko da sun taru gare shi" [Hajj: 73].

Shi kuma Ubangiji ya cancanci a yi masa bauta, saboda shi yake halitta, Allah (تعالى) yana cewa: "Shin, Wanda yake yin halitta yana yin kama da wanda baya yin halitta? Shin ba za ku wa'aztu ba" [Nahl: 17].

Kuma kowani bawa yana tabbatar da cewa shi halitta ne, Allah kuma shine Wanda ya halicce shi, Allah (سبحانه) yana cewa: "Kuma lallai idan ka tambaye su, wa ya halitta su, Za su ce: Allah ne" [Zukhruf: 87].

            Kuma Allah maxaukaki shine MAMALLAKI, kuma mulki nasa ne, "Wannan shine Allah Ubangijinku, mulki nasa ne, Waxanda kuke roqo waninSa, ba su mallakar ko fatar jikin dabino" [Faxir: 13]. Kuma shi ya Mallaki dukkan halittarSa, "Nasa ne duk abinda yake cikin sammai da qasa" [Baqarah: 255].

Kuma dukkan halittu suna masu qanqan-da-kai da tasbihi wa Allah, "Sammai bakwai da qasa da waxanda suke a cikinsu suna yi masa tasbihi. Kuma babu wani abu face yana tasbihi, gami da gode Masa, Saidai kuma ba ku fahimtar tasbihinsu" [Isra'i: 44].

Hasali ma, dukkaninsu; da daskararrensu da masu rai daga cikinsu, suna yin sujjada wa Allah, "Kuma ga Allah ne wanda ke cikin sammai da qasa suke yin sujjada, cikin so da qi" [Ra'ad: 15].

            Allah shine shugaba (As-Sayyid), wanda bashi da abokin tarayya, Dukkan halittu kuma bayinSa ne, "Dukan wanda ke a cikin sammai da qasa, face zai je wa Mai rahama (Allah) yana bawa" [Maryam: 93].

Yana da MULKI cikakke dawwamamme, Mamallakin duniya da ranar sakamako, kuma a ranar lahira Allah zai bayyana, Sai ya ce:

"Mulki ga wa yake a yau?" [Gafir: 16]. Sai kuma ya masa wa kansa da faxinSa:

"Yana ga Allah Makaxaici Mai tilastawa" [Gafir: 16].

            Allah maxaukaki ya kevanta da JUJJUYA SHA'ANONIN HALITTUNSA kuma mallakarSa, saboda lamura dukkansu a hannunSa suke Shi kaxai, "Ku saurara! Na (Allah ne) halittu da Umurni" [A'araf: 54].

            (Allah) yana yin umurni, yana kuma hani, yana halitta, yana azurtawa, yana bayarwa yana hanawa, yana dankwafarwa yana xaukakawa, yana buwayarwa kuma yana qasqantarwa,  yana rayarwa yana kashe wa, "Yana shigar da dare akan yini, kuma yana shigar da yini akan dare, kuma ya hore rana da wata" [Zumar: 5]. "(Allah) yana fitar da rayayye daga matacce, yana kuma fitar da matacce daga rayayye, kuma yana raya qasa bayan mutuwarta" [Rum: 19]. Kuma yana fitar da abinda yake a voye, a cikin sammai da qasa.

            Kuma dukkan halittu suna qarqashin rinjayenSa da zartarwarSa, kuma zukatun bayi da makwarkwaxarsu suna hannunSa, kuma linzamin lamura yana qulle ne da hukuntawarSa da qaddarawarSa, kuma al'amari nasa ne gabanin komai da bayansa, Yana tsaye akan kowace rai game da abinda take aikatawa, kuma sama da qasa suna tsaye ne da umurninSa, "Kuma yana riqe da sama domin kada ta rikito akan qasa, face da izininSa" [Hajj: 65 ]. Kuma lallai Allah "Yana riqe da sammai da qasa domin kada su gushe" [Faxir: 41].

            Kuma dukkan halittun cikin sammai da qasa suna roqonSa, "Kowani yini Shi, yana cikin wani sha'ani (da aiki)" [Rahman: 29].

Kuma yana daga "SHA'ANONINSA" kasancewar yana gafarta zunubai, yana kuma shiryar da vatacce, yana yaye baqin ciki, yana kwaranye vacin rai, yana gyara karaya, yana kuma wadata faqiri, yana amsa addu'ar mabuqata, Allah (تعالى) yana cewa:

 "Kuma ba mu kasance masu gafala; mu kyale halittu ba" [Muminuna: 17].

            UmurninSa na bibiye wa-juna, NufinSa kuma shike zartuwa, don haka; Duk abinda ya nufa sai ya kasance, abinda bai nufa ba kuma baya kasancewa, yana halitta abinda ya so, yana kuma aikata abinda ya nufa, kuma al'amarinSa ya kasance abin qaddarawa tabbatacce, Babu mai hana abinda ya bayar, kuma babu mai bayar da abinda ya hana, kuma babu mai cin gyaran hukuncinSa, kuma babu mai mayar da abinda ya hukunta, kuma babu mai tunkuxe nufinSa, kuma babu mai canza kalmominSa, Ya qaddara abubuwan da ya qaddara wa halittu gabanin halittar sammai da qasa da shekaru dubu hamsin.

Kuma da halittu za su tattara akan wani abu da Allah bai rubuta shi ba, domin su sanya ya zama mai kasancewa, to, ba za su samu iko akan haka ba, Da kuma za su taru akan abinda zai kasance don su hana aukuwarsa, to, ba za su sami iko akansa ba. Kuma da al'umma zata haxu akan cutar da wani bawa wanda kuma Allah bai nufe shi da cutuwa ba, to, ba za su iya cutar da shi ba. Idan kuma da al'ummar za su haxu akan su amfanar da shi, Sai kuma Allah bai yi izinin ya samu amfani ba,  to, baza su amfane shi ba. Babu mai mayar da azabarSa idan ta zo sauka, babu kuma mai tunkuxe ta idan ta auku. Yana shiryar da wanda ya nufa –da falalarSa-, yana kuma vatar da wanda ya nufa da adalcinSa. umurninSa da zance suke kasancewa, kuma ababen aiki ne da su. Idan ya nufi kasancewar wani abu kawai ya kan ce da shi: Ya kasance, sai ya kasance. Kuma cikin dukkan aiyukanSa babu wani da zai tambaye shi "Ba a tambayarSa ga abin da yake aikatawa, alhali su ana tambayarsu" [Anbiya'i: 23].

            MaganarSa itace mafi kyan zance, KalmominSa basu da farko, kuma basa qarewa, "Kuma da dai duk abinda ke cikin qasa duka; na itatuwa (bishiyoyi) ya zama alqaluma, kuma teku yana yi masa tawada, a bayansa da waxansu tekuna bakwai, to lallai da kalmomin Allah ba su qare ba" [Luqman: 27].

            Kuma iliminSa (maxaukakin sarki) ya yalwaci kowani abu, saboda Allah ya san duk abinda ya kasance, da abinda bai kasance ba, da abinda ba zai kasance ba, kuma ya san abinda halittu za su aikata shi a gaba-gare su, da duk abinda suka aikata shi, "Kuma ya san abinda yake tudu da teku, kuma wani ganye ba ya faxuwa face ya san shi" [An'am: 59].  Kuma daidai da kwayar zarra bata motsawa a cikin duniya face da izininSa, Babu wani abu da yake vuya a gare shi a cikin qasa ko a cikin sama, kuma ya san abinda yake vuya a gare mu na abubuwan da suke aukuwa da al'ummai, da kuma abinda ya bayyana, kuma ya san abinda rayuka ke waswasinsa, da abinda zukata suke voyewa da sirrace-sirrace. Kuma ya san abinda mace take xauke da shi a cikinta, da abinda qasa take fitarwa, "da abinda yake sauka daga sama, da abinda yake hawa zuwa gare ta" [Saba'i, 2, da Hadid, 4 ].

"Gwargwadon zarra bata nisanta daga gare shi, a cikin sammai, da cikin qasa" [Saba'i, 3 ].

Kuma "Mabuxan gaibi (a wurinsa suke) babu wanda ya ke saninsu face shi" [An'am: 59].

Ilimin dukkan halittu gabaxayansa kamar kwayar ruwa ne guda xaya daga tekun ilimimnSa, "Kuma basa kewayawa da kome daga iliminSa, face da abinda ya so" [Baqarah: 255].

(Wata-rana) wani tsuntsu ya xauki ruwan teku da bakinsa, Sai Alkhadir yace wa Musa (عليهما السلام):

"Ilimina da iliminka be tauye komai  daga ilimin Allah ba, sai kamar yadda wannan tsuntsun ya tauye daga wannan kogin", Muslim ya ruwaito shi.

            (Allah) yana jin kowani sauti a duniya, ya faxa dangane da kansa: "Ina ji kuma ina gani" [Xaha: 46].

jinSa ya game dukkan sautuka; ba su sassavawa a gare shi, kuma ba su cakuxa, "Ko suna zaton lallai Mu, ba mu jin abinda suke asirtawa da ganawarsu" [Zukhruf: 80].

Wata mata ta zo izuwa ga Annabi (صلى الله عليه وسلم) alhalin tana qarar mijinta, A'isha kuma tana vangaren wannan xakin, Ta ce:

"Lallai ne Ni ina jin magananta, shashinsa kuma yana vuya a gare ni, Allah kuma a saman sammai guda bakwai ya ji maganarta, ban farga ba sai ga (Mala'ika) Jibrilu (عليه السلام) ya sauka da wannan ayar: "Haqiqa Allah ya ji zancen matar da take maka jayayya game da mijinta, kuma tana kai qara ga Allah, Shi kuma Allah yana jin muhawararku" [Mujadilah: 1]".

            Kuma duk wani motsi a bayan duniya (Allah) yana ganinsa; saboda ganinSa ya game dukkan ababen gani, yana ganin motsawan tururuwa baqa akan kurman dutse a cikin dare mai duhu. Kuma aiyukan bayi a cikin duhun dare basa vuya a gare shi "Wanda yake ganinka lokacin da kake tashi tsayuwar dare * da jujjuyawarka a cikin masu sujjada" [Shu'ara'i: 218-219].

Kuma dukkan aiyukan bayi Ubangijinmu yana jiransu a madakata, "Kuma lallai ne Ubangijinka yana nan a madakata" [Fajr: 14].

            Kuma saboda kasancewar halittun duka halittarSa ce, to, hukunci nasa ne; shi kaxai, Allah (تعالى) yana cewa:

"Babu hukunci face na Allah" [Yusuf: 40]. Kuma hukunce-hukuncenSa da haddodinSa da shari'oinSa sune mafi alherin hukunce-hukunce, Kuma babu wanda ya fi shi kyan hukunci "Kuma shine mafi alherin mahukunta" [Yusuf: 80].

Baya karkatar da hukunci, kuma baya zaluntar kowa, Allah (تعالى) yana cewa:

"Ashe, ba Allah ba ne mafi kyawon hukuncin masu hukunci?" [Attin: 8].

Yana yin hukunci "babu mai bincike ga hukuncinSa, kuma shi Mai gaggawar hisabi ne" [Ra'ad: 41].

            Amma dangane da rahamar Allah kuma, to, lallai haqiqa babu mai rahama irin tasa, (Allah) ya yaba wa kansa da faxinSa:

"Shine mafi rahamar masu rahama" [Yusuf: 64]. Kuma shine "Mafi alherin masu tausayi" [Muminuna: 109 ].

Yafi tausayawa fiye da Uwa ga Xanta, saboda wata-rana Manzon Allah (صلى الله عليه وسلم) ya ga wata mata cikin waxanda aka kamo; fursunan yaqi, tana ta neman xanta, Sai kuwa ta samu yaron, ta xauke shi, ta manna shi da jikin cikinta, ta shayar da shi, Sai yace wa SahabbanSa: "Shin kuna ganin wannan matar zata iya jefa xanta a cikin wuta? Sai suka ce: A'a! Sai Manzon Allah (صلى الله عليه وسلم): To, lallai ne Allah yafi tsananin tausayi fiye da wannan matar ga xanta", Bukhariy da Muslim suka ruwaito shi.

Wannan kuma saboda Allah (maxaukaki) ya halitta rahama guda xari, Sai ya saukar da guda xaya, wanda da ita ne, halittu a bayan qasa suke tausaya wa junansu, Sai kuma ya riqe yanki casa'in da tara a wurinSa. Kuma rahamarSa ta game kowani abu, Kuma Mala'ikun da suke xauke da al'arshi da waxanda suke kewaye da shi suna cewa:

"Ya Ubangijinmu, ka yalwaci kowani abu da rahama, da kuma ilimi" [Gafir: 7 ].

Kuma rahamarSa a miqe take, har zuwa ga lahira.

            (Allah) Mai karimci ne da kyauta, babu wanda yafi shi kyautayi, yana son kyautatawa da baiwa ga halittunSa, kuma yana azurta su daga samansu da kuma qasansu, "Ka ce: Wanene yake azurta ku daga sama da qasa?" [Yunus: 31 ].

FalalarSa tana da girma, kuma taskokinSa ba su qarewa, kuma hannayenSa a cike suke; Aikin ciyarwa ba su tauye su, suna yin baiwa da dare da yini, Manzon Allah (صلى الله عليه وسلم) ya ce:

"shin Ba ku ga abinda ya ciyar ba ne tun lokacin da ya halicci sammai da qasa, kuma yin hakan be tauye abinda yake hannunSa ba".

            Baya mayar da addu'ar da bayi suka yi, Allah (تعالى) yana cewa:

"Kuma idan bayina suka tambaye ka game da Ni, to, lallai ne Ni Makusanci, Ina amsa addu'ar mai addu'a idan ya roqe ni" [Baqarah: 186].

Babu wata buqata da take masa girman ya bayar da ita, koda kuwa dukkan bayi; Na farkonsu da na qarshensu, da Mutanensu da aljanunsu za su haxu akan qasa xaya, Sai su roqe shi, Sai ya baiwa kowani xaya daga cikinsu abinda ya roqa, to hakan ba zai tauye abinda yake wurinSa ba, sai kamar yadda allura idan aka shigar da ita teku zata tauye shi. Kuma ya xauki xawainiyar baiwa kowace halitta arziqinta, daga cikin mutane da aljanu, musulminsu da kafirinsu, da dukkan dabbobi, saboda "Babu wata dabba ga qasa face akan Allah ne arziqinta yake" [Hud: 6].

Kuma baiwar Allah ya kan yi ta, ba tare da yin gori ba. Shine mafi alherin masu azurtawa. Ya buxe qofofin baiwanSa ga bayinSa; sai ya hore tekuna, ya kuma gudanar da koguna, ya kuma malalar da arziqi, ya baiwa bayinSa arziqi mai yawa alhalin ba su roqe shi ba, haka kuma ya ba su daga kowani abu suka roqe shi. Kuma yana bijiro wa bayinSa lamarin su riqa roqonsa, a inda yake cewa:

"Wanene zai roqe Ni, sai in bashi".

Dukkan alkhairi daga wurinSa ne, "Kuma duk abinda ke tare da ku; na ni'ima to daga Allah ne" [Nahl: 53].

Kuma ya isar zuwa ga kowace halitta arziqinta; Sai ya azurta xan tayi alhalin yana cikin cikin mahaifiyarsa, da tururuwa a cikin raminta, da kuma tsuntsu a cikin sararin samaniya, da kifaye a cikin gulbin ruwa, "Kuma, dayawa daga dabbobi basa iya xaukar abincinsu, Allah yake ciyar da su, tare da ku" [Ankabut: 60].

Mai karimci ne, baya yarda a xaukaka buqatu izuwa ga waninSa, kuma duk wanda ya qi ya roqe shi, to, sai ya yi fushi akansa. Kuma lallai marashin rabo shine wanda yake rataya kwaxayinsa izuwa ga wanin Allah. Kuma babu wanda yafi tsananin haquri akan cutarwar da yake ji, fiye da Allah; (halittu) suna yin shirka a gare shi, kuma suna jingina masa haifar xa, amma shi kuma yana basu lafiya yana azurta su.

            Kuma yana yin farin ciki da tuban bawanSa, da yafi tsanani, fiye da mutumin da yake cikin dokar daji, sai abun hawansa ya gudu ya bar shi, har ya xebe tsammani, ya zo jikin wata bishiya, sai ya kwanta a qarqashin inuwarta, bayan ya xebe tsammani daga samun abin hawansa, Yana nan cikin wannan halin sai ga abin hawansa a tsaye a wurinsa, Sai yace, saboda tsananin farin ciki: "Ya Allah kai ne bawa na, Ni kuma nine Ubangijinka, wato: yayi kure saboda tsananin farin ciki".

            Ya datar –da falalarSa da karimcinSa- ma'abuta yi masa biyayya, kuma ya basu lada bayan dacen ya musu, Shine: Mai yin godiya; wanda yake bada lada akan abu kaxan, ya kuma gwavava sakamako akan aiki mai yawa; mai kyau guda xaya ya ninninka ta har sau goma, ko ninkin ba-ninkiya masu yawa. Kuma ya yi tanadi wa bayinSa a gidan aljannah da abinda ido bata tava gani ba, kunne shima bai tava jin labarinsa ba, kuma bai tava xarsuwa a cikin zuciyar wani Mutum ba, Kuma ya ce:

"Lallai haqiqa wannan arzurtawarmu ce, bata qarewa" [Sad: 54].

Kuma Ubangiji ba zai gushe ba, yana neman bayinSa su yarda da abinda yake basu; ya riqa cewa:

"Shin kun yarda? Sai su ce: Me yasa ba za mu yarda ba, alhalin ka bamu abinda ba ka baiwa wani daga cikin halittunka ba, Sai yace: Ni zan baku abinda yafi hakan falala? Sai su ce: Ya Ubangiji, Menene kuma yafi hakan falala? Sai yace: Zan saukar da yardata akanku; ba zan tava fishi da ku ba; har abada", Bukhariy ya ruwaito shi.

            Mawadaci ne da zatinSa, Abun nufi ne; Wanda halittu ke nufansa cikin buqatunsu, kuma Shugaba ne, Cikakke, don haka bashi da tunbi (balle yaci abinci), "Bai Haifa ba, kuma ba a haife shi ba * Kuma babu wani da ya kasance kwatankwacinSa" [Ikhlas: 3-4].

Kuma babu wani abin bautawa tare da shi, "kuma bai riqi mata ba, kuma bai riqi xa ba" [Jinn: 3]. "Kuma abokin tarayya bai kasance a gare shi ba, cikin mulkinSa, kuma wani majivinci daga qasqanci bai kasance a gare shi ba" [Isra'i: 111].

Kuma babu wani abin bautawa tare da shi.

Ba a yi masa xa'a da biyayya sai da falalarSa.

Ba a kuma sava masa sai da iliminSa.

Mawadaci ne ga barin halittunSa.

Kuma kowani abu yana tsaye ne, da Shi, kuma (kowani abu) mabuqaci ne izuwa gare shi, "Ya ku mutane, lallai ku ne mabuqata zuwa ga Allah, Shi kuma Allah shine Mawadaci Abin godiya" [Faxir: 15].

Biyayyar masu biyayya bata masa amfani, haka savon masu savo baya cutar da shi, "Idan kuka kafirta, to, lallai ne Allah wadatacce ne daga barinku" [Zumar: 7 ].

Kuma da mutane da aljanu za su kasance akan zuciyar wanda yafi taqawa daga cikinsu, to da hakan bai qara komai akan mulkin Allah ba. Kuma da za su kasance akan zuciyar wanda yafi fajirci daga cikinsu, to da hakan bai tauye komai akan mulkin Allah ba. Kuma bayi ba za su kai ga amfanar da shi ba, balle su amfane shi. Kuma ba za su kai ga cutar da shi ba, balle su cutar  da shi.

Yana tsaye da kanSa, Mai girma ne Babba, Mai qarfi, Buwaya itace kwarjallenSa, Girma kuma mayafinSa, Mai mulki ne bashi da abokin tarayya, Makaxaici ne bashi da kishiya, Mawadaci ne; bashi da mataimaki, Maxaukaki ne; bashi da abin buga misali, "Kowani abu mai halaka ne, baicin fiskarSa" [Qasas: 88: ].

Kuma kowani mulki mai gushewa ne in banda mulkinSa, kuma kowace falala zata yanke in banda falalarSa, yana kewaye da kowani abu, amma babu wani abu da yake kewaye da shi, "Gannai basa iya riskarsa, Shi kuma yana riskar gannai" [An'am: 103 ].

"Kuma Qasa duka damqarSa ce, a ranar qiyama, kuma sammai ababen naxewa ne ga damanSa" [Zumar: 67 ].

"Zai sanya sammai a ranar qiyama akan yatsa xaya, qasa akan yatsa xaya, duwatsu akan yatsa xaya, bishiyoyi akan yatsa xaya, da ruwa da turvaya akan yatsa xaya, sauran halittun kuma akan yatsa xaya, Sa'an nan sai ya jijjiga su, ya ce: Ni ne Mai mulki" Bukhariy ya ruwaito shi.

            Ba a yin magiya da shi a wajen wani daga cikin halittunSa, kuma babu wani da zai yi ceto a wurinSa face da izininSa, savanin halittunSa; waxanda ake iya samun cetonsa ba tare da izininsu ga manema ceton nasu ba.

Kujerar mulki (Kursiyyun Allah) -wanda wurin ajiye qafofi ne- ta yalwaci sammai da qasa (a girma).

Amma shi kuma kursiyyun idan aka kwatanta girmansa da na al'arshi ba a bakin komai yake ba, sai kamar zoben qarfe da aka jefa shi cikin wani babban fili, kuma shi al'arshi shine yafi dukkan halittu girma, Mala'ikun da suke xauke da shi, tsakanin fatar kunnen xayansu da kafaxarsa kamar tafiyan shekaru xari bakwai ne.

Allah kuma, Ya daidaita a saman al'arshinsa, kamar yadda ya dace da matsayinSa, kuma lallai ne shi ya wadata daga al'arshin, da duk abinda ke qasa da shi (na halittu).

"Kuma sammai suna kusa su tsattsage, saboda shi" [Maryam: 90]. Ma'ana: Su tsattsage saboda tsoron Allah.

Kuma idan ya furta wahayi sai wata girgiza ko tsawa mai tsanani ta kama sammai, Sai kuma ma'abuta sammai su suma, su faxi suna masu sujjada.

Rayayye ne, Tsayayye; Gyangyaxi baya kama shi haka kuma barci, "kuma baya dacewa a gare shi ya yi barci, yana saukar da adalci kuma yana xaga shi, Ana xagawa zuwa gare shi aiyukan dare gabanin na yini, da kuma aiyukan yinin gabanin na dare, Abinda ya hana ganinSa (shamaki) shine haske, da zai yaye shi da sai hasken fiskarSa ya qona dukkan abinda ganinSa ya kai zuwa gare shi".

Shi ne Na farko; babu wani abu gabaninSa, shine Na qarshe; babu wani abu a bayanSa, kuma shine Maxaukaki; babu wani abu a samanSa, kuma shine voyayye; babu komai da yake hana saninSa".

            Mai iko ne akan kowani abu, babu abinda yafi shi tsananin qarfi, Mutanen ADAWA sun ruxu da qarfin da suke da shi "Sai suka ce: Wanene ya mafi tsananin qarfi daga gare mu? Ashe ba su gani cewa lallai Allahn da ya halitta su, shine mafi qarfi daga gare su" [Fussilat: 15].

Kuma, Allah yafi qarfin iko, akan halittarSa, fiye da ikon da shugaba yake da shi akan bawansa. Ya faxa –dangane da kanSa-:

"Lallai ne qarfi ga Allah yake gabaxaya" [baqarah: 165].

Babu wani abu da yake gagaranSa a cikin qasa da sama; ya halitta sammai da qasa a cikin yini guda shida, kuma wata gajiya bata tava shi ba.

Duk wanda Allah ya taimake shi to babu mai rinjayarsa, kuma babu dabara (ko kauce wa savo) babu kuma qarfi ga halittu sai da Allah.

lamarinSa kamar walqawar gani, ko kuma mafi kusa.

Kuma yana da rundunonin da babu wanda ya sansu sai Shi kaxai.

Kuma idan lamarin duniya ya zo qarewa to sai ya girgiza qasa girgizawa, ya kuma dake ta; rushewa, ya kuma tafiyar da duwatsu tafiyarwa, ya kuma sheqe su sheqewa.

Kuma da busa xaya ne halittu za su firgita, ida kuma aka sake wata sai su mutu, Idan kuma aka yi ta uku sai su tashi zuwa filin da za a tattara su.

Kuma idan (Ubangiji) zai sauka saboda yin hukunci sai sama ta kekkece, sai ta kasance lugu-lugu kamar man shafawa.

Mai tsarkaka ne Mai tsarki, wanda ya kuvuta da kowani aibi da naqasa, Yana da mafi xaukaka daga jinsin kamala, daga cika da kyau kuma, (Allah) yana da mafi haske, bashi da kishiya, kuma bashi da misali, bashi da takwara, kuma bashi da tsara, "Babu wani abu da yake tamkarSa, kuma shi ne Mai ji Mai gani" [Shura: 11].

            BAYAN HAKA, YA KU MUSULMAI!

            Shin ba zai zama wajibi akanmu mu SO Ubangijinmu wanda waxannan sune sifofinSa da aiyukanSa ba?

Kuma mu yi GODIYA a gare shi, muna masu kevance shi da ibada da IKHLASI?!

Kuma duk wanda ya so Allah, ya kuma yi bauta a gare shi, to Sai Allah ya so shi, kuma duk wanda ya so Allah sai ya riqa aikin kusanci zuwa gare shi, yana mai qanqan da-kai a gare shi, yana miqa wuya, tare da xebe kewa da shi, da samun nitsuwa, ya kuma yi fatan samun ladanSa, ya kuma ji tsoron uqubarSa, Sai kuma ya riqa sauke buqatunsa zuwa gare shi, yana yin tawakkali akansa (dogara ga Allah).

            Kuma duk wanda ya yi godiya wa Allah, ya kuma yawaita yabo a gare shi, to,  sai ya xaukaka; Saboda babu wani da yafi Allah son yabo, saboda haka ne ya yaba wa kanSa.

           

A UZU BILLAHI MINASH SHAIXANIR RAJIM:

"Ba su girmama Allah yadda ya cancanci a girmama shi ba, lallai ne Allah Mai qarfi ne Mabuwayi" [Hajj: 74].

            ALLAH YAYI MINI ALBARKA NI DA KU CIKIN ALQUR'ANI MAI GIRMA. …

             

HUXUBA TA BIYU

Godiya ta tabbata ga Allah kan kyautatawarSa;  Yabo kuma nasa ne bisa ga datarwarSa da kuma ni'imominSa,

Ina shaidawa babu abin bautawa da gaskiya sai Allah; shi kaxai yake bashi da abokin tarayya;      Ina mai girmama sha'aninSa.

Ina kuma shaidawa lallai annabinmu Muhammadu bawansa ne, kuma manzonSa ne.

Allah yayi daxin salati a gare shi, da iyalansa da sahabbansa, da kuma sallama mai ninnukuwa.

Ya ku musulmai…

            Duk wanda ya yi shirka ga Allah, ya kuma roqi waninSa, daga cikin halittu da matattu to, haqiqa ya tauye haqqin Allah; Ubangijin talikai, kuma ya munana zato a gare shi, kuma ya daidaita waninSa tare da shi.

Shi kuma shirka yana ruguza dukkan aiyuka, kuma ba a gafarta wa ma'abucinsa, kuma (sahibinsa) ba zai shiga aljannah ba, kuma Shi a cikin wuta yana daga masu tabbata. Kuma shirka shine mafi munin canjin da yake tava fixrah, kuma shine mafi girman fasadi da varna a bayan qasa, kuma shine asali ko tushen kowani bala'i, kuma matattarar kowace cuta, cutarwarsa yana da girma, kuma hatsarinsa yana da muni.

Suma dangogin savo mabanbanta shu'umcinsu yana da girma, saboda suna haxuwa ga bawa; su halaka shi, kuma su shamakance tsakanin bawa da zuciyarsa.

Kuma gwargwadon yadda zunubi ke yin qaranta a ido (n bawa), to, gwargwadon yadda yake yin girma a wajen Allah Kenan.

Kuma kada ka yi dubi zuwa ga qarantar savo, A'a, (ana son) ka yi dubu zuwa ga girma (Allan) da ka sava masa.

            Sannan ku sani;         Lallai  Allah ya umurce ku da yin salati da kuma sallama ga Annabinsa

Sai yace, a cikin mafi kyan abinda aka saukar:

"Lallai Allah da Mala'ikunSa suna yi salati ga wannan annabin, Yak u waxanda suka yi Imani, ku yi salati a gare shi, da sallamar amintarwa" [Ahzab: 56].

            Ya Allah! Ka yi salati da sallama da albarka, ga annabinmu Muhammadu,

            Kuma Ya Allah! Ka yarda da khalifofi shiryayyu, waxanda suka yi hukunci da gaskiya, kuma da shi, su ka kasance suke yin adalci, Abubakar da Umar da Usman da Aliyu, da kuma sauran sahabbai gabaxaya, Ka haxa da Mu tare da Su, da kyautarka da karamarka, Ya Mafi kyautar masu kyauta.

            Ya Allah! Ka xaukaka Musulunci da Musulmai, ka qasqantar da shirka da Mushirkai, kuma ka ruguza maqiyan addini, Kuma ka sanya –Ya Allah!- Wannan qasar cikin aminci da nitsuwa, da wadaci da walwala, da kuma sauran qasashen Musulmai.

            Ya Allah! Ka gyara halin Musulmai a kowani wuri.

            Ya Allah! Ka mayar da su izuwa ga addininka, mayarwa mai kyau.

            Ya Allah! Ka sanya qasashensu su zama garurrukan aminci da zaman lafiya, Ya Mai qarfi, Ya Mabuwayi!

            Ya Allah! Ka tabbatar da rundumarmu, Ya Allah! Ka tabbatar da dugadugansu, Ya Allah! Ka daidaita jifansu, kuma ka azurta su da yi don kai (ikhlasi), Ya Ma'abucin girma da Baiwa.

            Ya Allah! Ka datar da shugabanmu, kuma ka sanya aikinsa ya zama cikin yardarka. Kuma ka datar da sauran jagororin Musulmai wajen yin aiki da littafinka, da hukunta shari'arka, Ya ma'abucin girma da yin baiwa.

            "Ya UbangijinMu ka bamu mai kyau a duniya, ka bamu mai kyau a lahira, kuma ka kare mu daga azabar Wuta" [Baqarah: 201].

            Ya Allah! Lallai ne Mu muna roqonka ilimi mai amfani da kuma aiki mai kyau.

            Ya Allah! Lallai kai ne abin bautawa; Babu wani abin bauta face kai, Kai ne Mawadaci, mu kuma mune Faqirai, Ka saukar mana da ruwan sama kada ka sanya mu daga cikin masu xebe tsammani, Ya Allah! Ka bamu ruwan sama!

            Ya Allah! Ka bamu ruwan sama!!

            Ya Allah! Ka bamu ruwan sama!!!

            "Ya Ubangijinmu lallai ne Mu mun zalunci kayukanmu, idan har baka gafarta mana, ka yi rahama a gare mu ba, za mu kasance daga cikin masu hasara" [A'araf: 23].

            Bayin Allah!!!

            "Lallai Allah yana yin umurni da adalci, da kyautatawa, da baiwa makusanci, kuma yana yin hani akan alfasha da abin qi, da zalunci, Yana muku wa'azi da fatan zaku zama masu tunawa" [Nahli: 90].

Ku riqa ambaton Allah Mai girma da daraja zai ambace ku, ku gode masa akan ni'imominSa zai muku qari, kuma ambaton Allah shine mafi girma, kuma lallai Allah ya san abinda kuke aikatawa.

,,,          ,,,          ,,,

,,,          ,,,          ,,,