KWANAKI GOMAN ZULHIJJAH وليال عشر

FALALAR GOMAN FARKO NA WATAN HAJJI

(وليال عشر)

TANADAR

(زاد)

TARJAMAR

ABUBAKAR HAMZA

           

Yana daga falalar Allah ta'alah akan bayinsa, yadda ya sanya musu lokaitai na musamman, na  qara yin ayyukan xa'a, waxanda a cikinsu ake ninnika lada, dan mutane su yi ta gasa a cikin ayyukan da  za su kusantar da su, zuwa ga Ubangijinsu a cikin waxannan lokutai,

Daga cikin waxannan lokutan MASU FALALA:

KWANAKI GOMAN FARKO NA WATAN WATAN HAJJI, Wannan kuma ya kasance ne, saboda abinda Allah ya ajiye a cikinsu, na falalarSa, da kuma yadda ya ke karrama bayinSa,

Saboda a cikinsu ne;

Ake samun YININ DA AKE KIRA RANAR TARWIYAH (wato, takwas ga wata), da RANAR ARFAH, da RANAR LAYYAH,

Kuma domin girman sha'anin kwanakin nan guda goma ne, Allah ya yi rantsuwa da su, a cikin faxinsa:

"INA RANTSUWA DA ALFIJIR * DA KUMA DARARE GUDA GOMA" [Fajr: 1-2].

            Kuma Manzon Allah (sallal lahu alaihi wa sallama) ya bada labarin cewa, su ne mafifitan yinin da ake da su a duniya, a cikin faxinsa:

"Mafi girman kwanakin duniya su ne, kwanakin nan guda goma", wato: goman farkon watan hajji.

            [Ibnu-Hibban ya rawaito shi, kuma Albaniy ya inganta shi].

            Abu-Usman An-Nahdiy yana cewa:

"Magabatan kwarai sun kasance suna girmama, kwanaki goma daga watanni uku, GOMAN QARSHE NA WATAN RAMADHANA, da GOMAN FARKO NA WATAN HAJJI, da GOMAN FARKON WATAN MUHARRAM".

       YAYA YA KAMATA MUSULMI YA TARBI WAXANNAN KWANAKIN?

An rawaito  daga Abdullah ibn Abbas yana cewa:

Manzon Allah –sallal lahu alaihi wa sallama- ya ce:

"Babu wasu kwanaki da aiki nagari ya fi soyuwa a cikinsu, a wurin Allah Mabuwayi da xaukaka, fiye da waxannan kwanakin", wato, goman farko na watan hajji.

Sai sahabbai su ka ce: Ya Ma'aikin Allah! Koda jihadi ne, fi sabilillah?

Sai  ya ce: "Koda jihadi ne, fi sabilillah, sai ga mutumin da ya fita da kansa, da kuma dukiyarsa baki xaya, amma shi da dukiyar tasa babu wanda ya koma". [Bukhariy ya ruwaito shi, 969].

            Shi kuma, AIKI NA GARI Ya qunshi dukkan nau'uka na ibada, kamar  azumi, da sallah, da hajji, da zikiri, da yin kabbara; domin girmama Allah ta'alah, da tilawar Alqur'ani, da ciyarwa ta fiskokin biyayya, da makamantan haka,

            Daga cikin ibadodin da shari’a ta qarfafa YINSU A WAXANNAN KWANAKI

YIN AZUMI: In banda rana ta goma (wato, ranar sallah), saboda hadisin da aka ruwaito daga daya daga cikin Matan Manzon Allah –sallal lahu alaihi wa sallama- ta ce:

"Manzon Allah –sallal lahu alaihi wa sallama- ya kasance yana azumtar kwanaki tara na watan hajji".

[Abu-dawud da An-Nasa'iy ne suka ruwaito shi, kuma Albaniy ya inganta shi].

Musamman yin azumi a ranar arfah ga wanda ba mahajjaci ba, wanda azumtarsa, ke kankare zunaban shekaru biyu.

ABU NA BIYU: Daga cikin ibadun da shari’a ta qarfafi YINSU A WAXANNAN KWANAKI

YAWAN AMBATON ALLAH DA KABBARORI,

Allah ta'alah yana cewa:  

"KUMA SU AMBACI SUNAN ALLAH, CIKIN KWANAKI SANANNU, AKAN ABINDA YA AZURTA SU DA SHI, NA DABBOBIN NI’IMA (wato, raquma, da shanu, da tumaki)" [Hajj, 28].

KWANAKI SANANNU a cikin ayar sune KWANAKIN GOMAN FARKO NA WATAN HAJJI.

ABU NA UKU: Daga cikin ibadun da shari’a ta qarfafi YINSU A WAXANNAN KWANAKI

YIN AIKIN HAJJI,

Kuma shine mafificin ayyukan da ake yi a cikin waxan nan kwanaki guda goma,

Manzon Allah –sallal lahu alaihi wa sallama- yana cewa:

"Hajji mabruri (wato, hajji karvavve), bashi da sakamako, face Aljannah" [Bukhariy da Muslim].

ABU NA HUXU: Daga cikin ibadun da shari’a ta qarfafi YINSU A WAXANNAN KWANAKI

YIN LAYYAH,

Duk wanda ya yi nufin yin Layyah, to sai ya kame, daga yanke gashinsa da faratunsa (akaifa),tun daga shigar watan hajji, har zuwa lokacin da zai yanka, abin layyansa.