hudubar jumaa 12 zulkaadah 1438h ta Dr. Salah Albudair daga Masallacin Manzon Allah SAW

HUXUBAR MASALLACIN ANNABI

(صلى الله عليه وسلم)

JUMA'A, 12 /ZULQA'ADAH/1438H

daidai da 04/OGOSXOS/ 2017M

LIMAMI MAI HUXUBA

SHEHI SALAH BN MUHAMMADU ALBUDAIR

TARJAMAR

ABUBAKAR HAMZA
بسم الله الرحمن الرحيم

HUXUBAR FARKO

       Ya ku musulmai …

Duniya kaxan ce, mai qarewa, ni'imar lahira kuma tana da girma, tana wanzuwa,

Ya zo daga Almustaurid bn Shaddad (رضي الله عنه) ya ce: Manzon Allah (صلى الله عليه وسلم) ya ce: "Wallahi! Duniya idan an yi kwatanci da lahira, ba komai ba ce, sai kamar misalin xayanku, ya sanya hannunsa a cikin teku, sai xayanku ya yi dubi da me hannunsa zai koma", Muslim ya rawaito shi.

Don haka, Duniya kamar ruwan da ya maqale ne a yatsar wanda ya nitsar da ita a cikin kogi mai yawan ruwa, Ita kuma lahira ita ce kamar sauran kogin da ruwansa ke maqare, wanda kumfarsa ke hauhawa, tashinsa kuma ke xaukaka,

Ta yaya Mai sakaci zai yi sakaci kan ni'imar lahira, saboda wani abin duniya qasqantacce, wanda kuma an yi kusa a barta, kuma rabuwa da ita ya qarato, kuma babu abinda ya saura daga duniya face tavo mai sharri da wari, da dudduvin ruwa mai gauraye, da ababen firgici na xaukar izina, da uqubobi masu wanzuwa, da fitintinu yanki- yanki, da jeruwan musibu masu tsanani, da sakacin mutanen qarshe, da qarancin mataimaka, cikin rayuwar da ta cakuxa da gauraye, wanda ke haxe da zogi da raxaxi.

Sai ku ji tsoron Allah da taqawa –Ya ku bayin Allah- saboda mutuwa an qulla ta a goshinku, duniya kuma ana nannaxe ta, ta bayanku, kuma sau-dayawa rauni ya kan yi kisa, kuma tuntuve na iya halakarwa, kuma sau-dayawa kalma tana halakarwa.

 Ya kai bawan Allah… !!!

Da za ka xauka duniya gaba xayanta, tana hannunka,

Da kwatankwacinta, duka an haxa maka,

To me, ze wanzu na duniya, a wurinka, lokacin mutuwarka?

Cikin kowani yini akwai tarin ababen lura,

Kuma cikin yadda ake mutuwa, akwai abin hani, in ka kasance wanda zai hanu

To, kuma har yaushe, zuwa yaushe

Ba za ka hanu daga aikata laifi ba, kuma ba za ka yi taqawa ba,

Har zuwa yaushe za ka cigaba da dogewa cikin ruxu, da gafala

Kuma har yaushe irin wannan barcin,

kuma a wani yinin za ka farka

Haqiqa rayuwa ta tozarta, mummunan tozarci,

Alhalin sa'a xaya daga cikinta za a saye ta, da gwargwadon cikin sama, da qasa,

Mai qarewa, za ka canza da mai wanzuwa, saboda wautarka

Ko ka canji neman fushin Allah da yardarsa, ko shiga wuta da aljanna

A hakan, Shin kai masoyin kansa ne, ko maqiyi?

Domin kana jifan ranka da dukkan musiba

Haqiqa ka sayar da ranka, Vacin ran da zanyi akanka mai araha ne

Alhalin ta kasance da haka, ba na haqiqa ba

            Ya ku musulmai!!!

Lokutan rayuwa suna xauke da abin lura, wanda qaddara ta ke gudana da su, mulki ne da ake tsige shi, da lafiyar da ake xauke ta, da bala'in da ke aukuwa,

kuma kowani mahaluki an yi shi domin qarewa, haka shima mulki na tafiya domin qarewa, kuma babu mai dawwama idan ba mulkin Allah ba; tsarki ya tabbata a gare shi sarki Mai mulki Mai rinjaye, wanda kuma ya kaxaitu da buwaya da wanzuwa. Duk wanda ba shi ba kuma, to mai qarewa ne.

Me ya  samu idanu ga su a bubbuxe, amma basu gani!

Me ya samu qaiqasassun zukata basu yin tunani!!

Me ya samu rayuka su ke mantuwa; basu tunawa!!!

Ko dai talalar da aka yi a gare su, shi ya ke ruxar su?

Ko kuma ayyukansu ne suka musu albishir da samun tsira?

Ko kuma basu da tabbaci ne, a batun qarewar duniya?

Ko ruxuwa ce ta mamaye su, sai rufi ya yi dabaibayi ga zukatansu?

Ya ke Rai; wanda ta ke ganin tana da yalwar lokaci,

Ya wanda ke ganin akwai wata saurar dama,

Ka taqaita buri, saboda lamarin ba a hannunka ya ke ba

Kuma alama, ko tutar mutuwa tana gaba gare ka

Shin ka manta, cewa mu mutane ne?

Wanda qaddara ke lulluve da mu,

Kuma muna cikin wata tafiya,

Wacce muke qarewa a cikin ramukan qabari?

Mutuwa za ta naxe mu,

Sa'annan za a tattara mu

To kuma har yaushe, ba za ka dena savo; ka hanu daga aikata su ba,

Kuma har yaushe jinka ba zai kiyaye maganar mai wa'azi ba

Zuciyarka kuma, ba zata yi taushi, ga maganar mai jan kunne ba

Shin lokacin qanqan-da kai, bai yi ba? Ina kuma sallar dare

Shin a cikin gyangyaxi mu ke, ko zuciyar ce, ta qaiqashe?

Ka farka –Ya kai xan'uwana- kuma ka kiyaye, kuma ina horonka akan barcin gafala

Shin za ka yi barci –Ya ruxaxxe- alhalin wuta ana rura ta

Kuma zafinta ba a kashe shi, garwashinta kuma baya mutuwa 

Madalla da mutumin da tunatarwa ta amfanar da shi

Sai wa'azi ya faxakar da shi,

sai ya kama aiki haiqan, bai zama cikin gafala ba

Ya kuma zage damtse; bai ruxu ba

Ya yi gaggawa, bai riqa cewa: da-sannu ba

Ya yi taka-tsan-tsan, ya kuma qauracewa abokan banza

Ya mayar da lamari ga Allah, ya tuba

Hasara kuma ta tabbata ga mutumin da son zuciyarsa ya lulluve masa gaskiya,

Shexaninsa kuma ya vatar da shi, ya dulmuyar da shi,

Bai qaru da komai ba face, gafala da qaiqashewar zuciya, da ji-da-kai, da girman-kai

"Ka ce: (Allah ya ce) Ya ku bayina, waxanda suka yi varna akan rayukansu, kada ku xebe tsammani daga rahamar Allah, lallai ne Allah yana gafarta zunubai gaba xaya, kuma lallai shi Mai gafara ne Mai jin-qai" [Zumar: 53].

HUXUBA TA BIYU

Yabo na Allah ne;  wanda ya kai matuqa wajen cika, da qurewarsa.Yabon da ke hukunta yardarSa, kuma ya ke qarin kusantarwa zuwa gare shi,

Ina shaidawa babu abin bautawa da gaskiya sai Allah; shi kaxai yake bashi da abokin tarayya, shaidawar da mu ke fatan samun afuwar Ubangijinmu da jin-qanSa,

Kuma ina shaidawa lallai annabinmu kuma shugabanmu Muhammadu bawanSa ne, kuma manzonSa; kuma annabinSa zavavvenSa, abin ganawarSa, majivincinSa, abin yardarSa, kuma abin zavinSa.

Allah yayi daxin salati da sallama a gare shi, da iyalansa da sahabbansa, da wanda ya yi aiki da sunnarsa, kuma ya shiryatu da shiriyarsa.

Ya ku musulmai!!!

           Ku bi dokokinAllah da taqawa, saboda taqawar Allah ita ce babbar abin nema, kuma xa'a a gare shi, shine mafi xaukakar nasaba, "Ya ku waxanda su ka yi imani ku bi dokokin Allah, iyaka tsoronsa, kuma kada ku mutu face kuna musulmai" [Ali-imrana: 102].

Ya ku Musulmai!!

Ya waxanda ku ke tsoron abu mai guba,

Ya waxanda ku ke guduwa daga zafin rana,

Ya wanda ku ke bayyanar da raki, akan tsananin zafi; na lokacin bazara,

Ya waxanda ku ke maganin cutarwar zafi, da dangogin tufafin auduga, da kittani da riguna,

Kuma ku ke yin garkuwa daga tartsatsin rana da gidajen cikin qasa, da waxanda su ke maganin zafi, da bishiyoyi da gidaddaji, da runfuna da lemomi, da kuma (uwa-uba) balaguro zuwa garurruka masu sanyi,

Ku nemi kariya daga wutar jahannama, da barin aikata savo, saboda wuta, ita tafi dacewan ku gudu daga gare ta, da garwashinta da dafin gubanta,

Kana gudun zafin rana, kuma kana neman kariyarsa,

To me yasa ba za ka gudu daga aukawa wutar jannama ba?

Rayuwarka ta hanyar kariya, ka qarar da ita, kana mai tsoron abu mai sanyi ko zafi

Sai dai abin da ya fi dacewa a gare ka, shi ne, ka kiyaye, yin savo, domin kada ka auka cikin wuta,

            Lallai, ku -a yau- kuna cikin wani zamanin fitintinu ratata, da sharrace-sharracen da su ke a jejjere, fitintinu irin na shubuhohi, da sha'awowi, waxanda sashensu ke sassauta sashe, qurar fitinar ta taso, aukuwarta kuma ta sanya zogi, cikin rayuwa marashin tabbas, wanda ta ke xaukar duk mutumin da ya miqa mata wuya, zuwa koma-baya, cikin aqidarsa da xabi'unsa, ta mayar da shi kuran baya cikin tunaninsa da halayensa,

            Sai ku farkar da zukata, daga makwancin gafalarsu, kuma ku karkatar da rayuka daga magangarar sha'awarsu, kuna masu fakewa a qarqashin inuwar littafin Allah, da kuma Sunnah,

            Kuma, ku sani lallai ku, kuna cikin kwanakin jinkirtawa, wanda kuma a bayansu sai zuwan ajali, cikin gaggawa,

            Kuma duk wanda yau xinsa bai amfane shi ba, to nesansa shi ya fi wahala a gare shi, kuma abinda ya vuya masa zai fi gazawa a cikinsa,

            Kuma lallai babu barcin da ya fi gafala nauyi,

kuma babu bautar da ta fi mallake mutum fiye da sha'awarsa,

kuma babu musibar da ta fi mutuwar zuciya,

kuma babu mai gargaxin da ya fi furfura (ko tsufa),

babu makomar da ta fi muni fiye da wuta,

saboda wuta "Ba komai ba ce, face tunatarwa ga mutane * A aha, (Allah ya ce:) ina rantsuwa da wata, da dare a lokacin da ke juyar da baya * da safiya a lokacin da ta waye * lallai (wutar) xayan manyan musifu ce * mai gargaxi ce ga mutane * Wanda ya so daga cikinku ya gabata, ko ya jinkirta" [Mudassir: 31-37].

            Sai ku yi salati da sallama ga Ahmad Mai shiryarwa, Mai ceton mutane gabaxaya; 

saboda idan Mutum ya yi salati a gare shi guda xaya, sai Allah ta'alah ya yi masa guda goma,

Ya Allah ka yi salati da sallama ga bawanka kuma manzonka Muhammadu,

Kuma ya Allah ka yarda da dukkan iyalan Annabi da sahabbai,

Ka haxa da mu, Ya Mai karimci, Ya Mai yawan baiwa,

Ya Allah ka xaukaka musulunci da musulmai,

Kuma ka qasqantar da shirka da mushirkai,

Kuma ka halaka maqiya wannan addinin,

Ka sanya wannan qasa ta zama cikin aminci da zaman lafiya da sauran qasashen musulmai.

Ya Allah ka datar da shugabanmu kuma jagoranmu izuwa ga abinda ka ke so, kuma ka yarda,

Ka kama qeyarsa izuwa biyayyarka da aikin taqawa

Ya Allah ka datar da xaukacin masu jagorantar lamuran musulmai izuwa ga yin hukunci da shari'arka,

da bin sunnar annabinka Muhammadu (صلى الله عليه وسلم), Ya Ubangijin halittu.

Ya Allah ka zama mai taimakon garin Halab da Shaam,

Ya Allah ka tausaya wa rauninsu,

Ya Allah ka yaqi wanda ya yaqe su,

Ya Allah ka yaqi wanda ya yaqe su,

Ya Allah ka yaqi wanda ya yaqe su,

Ya Allah ka saukar da azaba da qasqanci da fushinka ga wanda ya rushe gidajensu akansu,

Ya Allah ka kashe su da makaminsu,

ka qona su da wutar da su ka fura,

Ya Ubangijin halittu.

Ya Allah ka tseratar da waxanda ake ta raunana su daga cikin musulmai, a kowani wuri, Ya Ubangijin talikai.

Ya Allah ka kawo aminci a iyakokinmu,

ka kare rundunoninmu,

ka taimake su akan maqiyanka kuma maqiyansu,

Ya Ubangijin halittu.

Ya Allah ka karvi matattunsu cikin shahidai,

ka warkar da wanda aka yi masa rauni daga cikinsu,

Ya Mai amsa addu'a.

Ya Allah ka sanya addu'anmu ya zama karvavve,

Sautinmu kuma abun xagawa,

Ya Mai karimci, Ya Mai girma, Ya Mai jin qai.