Dr Salah Albudair MARABA DA MAHAJJATA 16 Zulkiidah 1440

HUƊUBAR MASALLACIN ANNABI SAW

JUMA'A 16/ZULƘI'IDAH/1440H

Daidai da 19/Yuliyo/2019M

LIMAMI MAI HUƊUBA

Shehun Malami Dr. Salah ɗan Muhammadu Albudair

TARJAMAR

ABUBAKAR HAMZA

بسم الله الرحمن الرحيم

Ya ku Musulmai 

Waɗannan fa Matafiyan mahajjata ne suka kusanto, suna keta sahara mai halakarwa, suna kutso falalen ƙasa da kilomitoci

    Sun jigata a cikin tafiyarsu, sannan sun zo bi-da-bi

Tawaga tana biye da tawaga a cikin sahara

Ya fatana! shin zan tashi na wayi gari

Sai na sunsuni ciyawar izkhiri ta Makkah da karan shukinta (na jalil)

Sai kuma na kunce jakata a kasar Annabi

Domin na kwana a harami maɗaukaki ina baƙo

Sau dayawa, yawale mai yawo da tafiye-tafiye, yanki-yanki, ƙasa-ƙasa, birni-birni, mai yawaita kai-komo da bulaguro, wanda yake ƙarar da taronsa da sisi akan hakan, Sai ka samu, ya yi nawa da sakaci kan tafiyar sauke ibadar hajji, ba tare da uzuri ba, na tsawon shekaru, har ya tsufa.

Baya burge zuciyata, sautin ƙaramin tsuntsu mai rera waƙa

Haka kuma murmushin fikar ƙaramin yaro a lokacin bulaguro

???

Saboda ba kowane bulaguro ke ƙayatar da Ni ba,

???

Saidai bulaguro zuwa ga hajji wanda za a saka mana da Aljannah

Wannan kuma baiwa ce daga kyautar Allah Makaɗaici

YA KU MUSULMAI!!!

Makkah da Madinah gari biyu masu haske da tsarkaka, sune wuri biyu da suka fi sauran garurruka daraja, muɗlaƙan, kuma sune suka fi kowane bagire a doron ƙasa girman matsayi da ijma'in Maluma (ba tare da saɓani ba);

Saboda Makkah nan ne wurin da wahayi ya fara sauka, maɓuɓɓugar addini, gari amintacce, alƙiblar Musulmai, makarkata ga zukatan Muminai, uwar alƙaryoyi, wanda bata da makamanci a cikin birane, kuma bata da tsara a cikin kasashe.

Ita kuma Madina, ita ce gari abin so ga Masoyinmu SAW, ita ce gidansa matabbatarsa, kuma garin da ya yi hijirarsa ta farko, garin sunnah, mafakar imani kuma ganuwar imani mai bashi kariya, kuma mafakar Musulunci da Musulmai.

Wahayi bai sauka ba, face a ƙasar Makkah da Madinah, kuma fitilar Manzanci bata haska ba sai akan ƙasarsu, kuma Annabi SAW bai rayu ba face akan turɓayansu.

 

An ruwaito daga Abdullahi ɗan Abbas -Allah ya ƙara yarda a gare su- ya ce:

Manzon Allah -sallal Lahu alaihi wa sallama- a ranar da aka je yaƙin buɗe garin Makkah, ya faɗa cewa:

"Lallai Allah ya haramta wannan gari (Makkah), a ranar da ya halicci sammai da ƙasa, don haka; Makkah harami ne da haramtawar Allah, har zuwa ranar ƙiyama. Kuma lallai yaƙi a cikinsa bai halatta ga wani Mutum a gabanina ba, kuma nima bai halatta a gare ni ba, sai a cikin wani zangon lokaci na yini, kuma lallai Makkah harami ne da haramtawar Allah, har zuwa tashin ƙiyama; ba a yanke ƙayar harami, ba a korar abin farautar harami, ba a ɗaukar abin tsuntuwar harami, sai ga wanda zai bada cikiyarsa, ba a cirar ciyawar da ta tsira a cikinsa",

Sai Abbas ya ce: Saidai ciyawar izkhir, saboda amfanin maƙeransu, da bukkokinsu?

Annabi ya ce: "Sai dai ciyawar izkhir". Bukhariy [1834, 3189], da Muslim [1353], suka ruwaito shi.

Kuma Manzon Allah SAW ya mayar da Madina harami, kamar yadda annabi Ibrahima ya mayar da Makkah harami, kuma ya karkata zuwa ga Madina sai ya ce: Lallai Madinah harami ne amintacce.

Don haka, idan ganyen bishiyar harami da abin farautar harami su ka kasance masu alfarma ababen girmamawa, to yaya alfarmar Musulmi, da alfarmar hajji, da kuma alfarmar Mahajjata, da amincinsu da ayyukansu na hajji!; don haka baya halatta Musulmi ya haifar da abinda zai kawo tasgaro ga amincin gari mai alfarma, ko tasgaro ga tsarin garin, da natsuwarsa, da walwalar waɗanda suka nufo Makkah da mazauna cikinsa, kuma bai halatta Musulmi ya cutar da Musulmai da zancensa ko aikinsa ba.

Allah Ta'alah ya ce: "Kuma wanda ya yi nufin ilhadi (karkatar da gaskiya) a cikinsa da zalunci, za mu ɗanɗana masa wata azaba mai radadi" [Hajji: 25].

Don haka, idan niyyatar zalunci da yin ƙudurin ilhadi ko karkatar da gaskiya yana hukunta uƙuba mai raɗaɗi, to yaya kuma ga Mutumin da ya yi ta'addancin aikata laifi mai haddi, ko ya aikata mummunan zunubi, ko ya zubar da jini (kisa), ko ya firgitar da amintattu, ko ya cutar da mai rauni, ko ya zalunci miskini, ko ya cuci Mahajjaci; ta hanyar gurɓata aƙidarsa, ko ha'intar alkawalinsa, ko cin amanarsa, To menene zai kasance sakamako da ukubarsa a wurin Allah, alhalin kuma ya keta alfarmar lokaci, da wuri, da Mutum!

Ɗana! Kada ka yi zalunci a Makkah; ƙanƙani ko babba

Ka kiyaye alfarmominta –Ya kai Ɗana- kada mai ruɗi ya ruɗe ka

Ɗana, lallai wanda ya yi zalunci a Makkah zai haɗu da sharrori

Domin za a bugi fiskarsa, kuma za a tuntsura shi wutar sa'ira akan kumatunsa

Ɗana, lallai ni na jarraba hakan, sai na samu mai yin zalunci a Makkah yana yin hasara

Allah ne ya mata baiwar aminci, da abinda aka gina a cikinta na benaye

Kuma Allah ya amintar da tsuntsayen cikinta, domin tsuntsu ba su da tsoro a Makkah

Giwaye, an halakar da rundunarsu ana jifansu a garin da duwatsu

Sai ka ji, idan ana baka labari, kuma ka fahimci yaya ƙarshen al'amura suke kasancewa

Yana shiga ma'anar zalunci da ilhadi a Masallacin harami: Aikata laifukan haram a Makkah, ko neman halatta su, kamar bayyanar da shirka da bidi'oi, da aukawa cikin zina da shan giya, da sace-sace, da cinye dukiyoyi, da makirci da wayo, da ɗaga tutoci domin raya bangaranci, da bidi'oi, da alamomin shirka, da shuka fitina da rura wutar saɓani da haifar da banbance-banbance a tsakanin Mahajjata, da ɗaukar taron hajji a matsayin wurin yaɗa jita-jita na ƙarya, da lalatattun aƙidu, ko yaɗa sabubban ƙiyayya da adawa, saboda wasu manufofi na siyasa, ko ƙabilanci ko ɓangaranci ko aƙida ko mazhaba.

Kuma hajji da waɗannan wuraren masu tsarki, lallai suna da girma da tsarkin da yafi ƙarfin a mayar da su wuraren yaɗa waɗannan ayyukan masu muni. Kuma al'amarin hajji da amincinsa yana ga hannaye masu ƙarfi, masu ginawa, masu bada kariya, masu tausayi, wanda ba za su bar miyagun Mutanen da suke nufin gurɓata lafiyar hajji, ko siyasantar da shi ba, domin shugabannin za su hana miyagun cimma manufarsu ko kaiwa ga samun burinsu.

YA KU MUSULMAI!!!

Wajibi ne akan 'yan Makkah da Madina da Masu zama a cikinsu, da sauran Mahajjata da masu umrah da ziyara, su riƙa girmama waɗannan wuraren masu tsarki, suna kiyaye su suna basu kariya, suna tsarkake su daga ayyukan saɓo da munanan laifuka ababen ƙi masu halakarwa.

Mummunan aikin da aka yi a harami ba a ninka shi ta fiskar adadi, saidai ya fi girman laifi, kuma ya fi tsananin zunubi, akan laifin da aka yi a wurin da ba harami ba.

Ibnul-ƙayyim –Allah Ta'alah ya yi masa rahama- ya ce: "Yin mummunan laifi a harami da kasar harami (Makkah), da kuma akan shumfuɗar Allah (Masallaci) yafi girman muni, akan aikata laifin, a wani ɓangare na Duniya".

Kuma ya ce, a cikin littafin Maɗalibi ulin nuha: "Kuma ana ninka kyawawan ayyuka da munana idan aka yi su a wuri mai daraja, kamar Makkah da Madinah da Baitul Maƙdis, da kuma a cikin Masallatai, haka kuma idan aka yi su a wani zamani mai falala, kamar ranar Juma'a, da watanni huɗu masu alfarma, da kuma a kwanakin watan azumi".

Shehun Malami Mar'iy bn Yusuf Alkarmiy ya ce: "Lallai an sani daga shari'a mai haske da addini miƙaƙƙe, cewa zunubi yana ninkuwa a wurare masu daraja da halaye maɗaukaka, to haka lamarin yake a wurare masu daraja. Sa'annan ya ce: Kowane wuri, ko zamani wanda yafi daraja, to saɓon Allah a cikinsa yafi muni, domin baƙar tawada tafi bayyana ga farin abu".

Nawawiy –Allah Ta'alah ya masa rahama- ya ce: "Zaɓaɓɓiyar magana itace, lallai yin makwabtaka da ɗakin Allah da kuma Masallacin Manzon Allah (jiwaar) a Makkah da Madina mustahabbi ne, sai ga wanda zato ya rinjaya masa cewa, zai auka cikin lamurra abin zargi, ko sashensu. Kuma haƙiƙa halittun da ba za a ƙididdige su ba, daga magabatan al'umma da wanda suke a bayansu, daga cikin waɗanda ake koyi da su, sun aikata mujawaran (a Makkah da Madinah)".

Kuma Ƙurɗubiy –Allah Ta'alah ya masa rahama- ya ce: "Haka kuma, shari'a a wurare dayawa ta bayyana cewa, lallai duk lokacin da alfarma ta ninku, sai aka keta su, to uƙubar itama sai ta ninku".

Kuma Shekhul Islam Ibnu-Taimiyyah –Allah Ta'alah ya masa rahama- ya ce: "Yin saɓo a kwanakin da ake girmamawa da wuraren da ake girmamawa, zunubinsu da uƙubarsu yana yin kauri, gwargwadon falalar zamanin, da wurin".

Kuma Ƙurɗubiy –Allah Ta'alah ya masa rahama- ya ce: "Kuma idan Allah Subhanahu ya girmama abu, ta ɓangare guda, to sai ya zama yana da alfarma guda ɗaya, idan kuma ya girmama shi ta ɓangarori biyu, ko ɓangarori dayawa, sai alfarmarsa ta kasance mai yawa, to sai a ninninka uƙuba akansa idan aka yi mummunan aiki, kamar yadda ake ninka lada idan aka yi aiki kyakkyawa; domin wanda ya yi biyayya ga Allah a cikin wata mai alfarma, a kuma gari mai alfarma, to ladansa ba kamar na Mutumin da ya yi masa biyayya a watannin da basu da wata alfarma, ko a garin da ba harami ba. Haka wanda ya masa biyayya a watan da bashi da alfarma, amma a gari mai alfarma, baya zama daidai da wanda ya masa biyayya a watan da bashi da alfarma, a kuma garin da bashi da alfarma".

YA KU MUSULMAI!!!

Ku girmama ababen da Allah ya basu alfarma a cikin halin haramarku da wajensa, kada kuma ku ƙetare iyakokinSa, kada ku halatta wurare masu alfarma, Allah Ta'alah ya ce: "Wannan kuma, saboda wanda ya girmama hukunce-hukuncen Allah حرمات الله, to shine mafifici a gare shi a wurin UbangijinSa" [Hajji: 30].

Alfarmomin kuma sune: Girmama mash'arul harami (wuraren hajji), da ɗaki mai alfarma, da Masallaci mai alfarma, da gari mai alfarma, waɗannan sune alfarmomin.

Kuma ku girmama abinda Allah ya umurce ku da girmama su, kuma ku gabatar da abinda Allah ya umurce ku da gabatar da su, kuma ku nisanci abinda Allah ya hukunta haramcinsa, don ku samu falalarSa da ladanSa da ni'imarSa.

Ina faɗan abinda kuke ji, kuma ina neman gafarar Allah, sai ku nemi gafararSa, lallai shi ya kasance ga masu mayar da lamuransu gare shi Mai yawan gafara ne.

HUƊUBA TA BIYU

  

YA KU MUSULMAI!!!

Sunnah ta tabbata kan ninka ladan sallah a Masallaci mai alfarma da Masallacin Annabi SAW, wato ninkawa ta fiskar adadi, ga farilla da nafila, ga maganar da tafi inganci daga cikin maganganun Maluma biyu.

An ruwaito daga Jabir -Allah ya ƙara yarda a gare shi- ya ce: Manzon Allah -sallal Lahu alaihi wa sallama- ya ce: "Yin sallah a Masallacina wannan yafi salloli dubu a waninsa falala; in banda Masallaci Mai alfarma. Sallah kuma a Masallaci Mai alfarma yafi  salloli dubu ɗari, a Masallacin da ba shi ba". Ahmad ya ruwaito shi, [14694، 15271], da Ibnu-majah.

Saidai babu wani dalili ingantacce da ya nuna cewa, kyakkyawan aikin da aka aiwatar a garin Makkah ana ninka ladansa zuwa lada dubu ɗari. Ko yake cewa ana ninka ladan azumin Ramadhana idan aka yi shi a garin Makkah, ko a Madinah zuwa ladan azumin watanni dubu ɗari, ko a bada ladan Ramadhana guda saba'in. Dukkan wannan babu sunnar da ta tabbatar da shi, kuma babu wani dalili akan hakan. Kuma hadisan da suke ɗauke da wannan ma'anar ko dai da'ifai ne, ko yasassun hadisai na ƙarya.

Magana ingantacciya itace, lallai kyawawan ayyukan da aka yi a lokaci mai daraja, da wuri mai daraja, ana ninka ladansu, ninkawa ta fiskar girma, ba ta fiskar adadi ba, sai abinda dalili (ingantacce) ya yi nuni akansa.

Kuma suma munanan ayyukan da aka zartar da su a wurare ko lokatai masu daraja zunubinsu yana bunƙasa ta fiskar girma, ba ninkuwa ta fiskar adadi ba.

YA KU MAHAJJATA DA MASU UMRAH DA ZIYARA!!!

Ku ribaci lokacin zamanku a garin Makkah da Madinah, ta hanyar kwazo wajen aikata kyawawan ayyuka, da yawaita aikata su, kuma ku yawaita tuba da neman gafara, kuma ku bayyanar da rusunawarku da ƙan-ƙan-da kai da nadama, da nuna buƙatuwarku ga Ubangijnku, da bayyanar da lalura; domin kuna wurin saukowar rahama, kuma wuraren karɓar ayyuka, da fagagen da ake zaton amsa addu'oi da gafara, da 'yanta Bayi daga faɗawa Wuta.

Ku riƙa tuna girman wuraren, da falalar lokatan.

Allah ya haɗa addu'oinku da amsawa, neman gafararku kuma da yarda, ayyukan da kuke yi kuma ya karɓa.

Addu'a ….

……………….

HUSAIN ALUSSHEIKH 2 zulkiidah 1440H

HUDUBAR MASALLACIN ANNABI (r)

JUMA'A 2/ZUL KI'IDAH/1440H

LIMAMI MAI HUXUBA

SHEHI Husain bn Abdul'aziz AlusSheikh

TARJAMAR

ABUBAKAR HAMZA
بسم الله الرحمن الرحيم

Huɗubar farko

Cikin zuwan zamani wani bayan wani, akwai abin lura, kuma cikin sassaɓawar dare da yini akwai abin tunani, Allah Subhanahu yana cewa: Kuma shi ne ya sanya dare da yini akan mayewa, ga wanda yake son ya wa'azantu, ko yake nufin ya yi godiya [Alfurƙan: 62].

Abin nufi da faɗinSa khilfah shine masu maye wa juna, a fiskar halitta da ƙaddara, ma'ana ɗayansu ya kan zo ya maye gurbin ɗayan, kuma kowanne yana zama mayewar ɗan'uwansa, wannan a bayan wannan, ɗaya  bayan ɗayan; da haske ko dufu, ko tsawo ko nuƙsani, kamar yadda Allah Subhanahu ya ce: Sai  muka shafe  ayar dare, kuma muka sanya ayar rana  mai sanya a iya gani [Isra'i: 12].

Kuma Allah Mabuwayin Sha'ani  ya ce: Kuma dare aya ce  a gare su Muna feɗe rana daga  cikinsa, sai ga su suna masu shiga dufu [Yashin: 37].

Kuma kalmar Khilfah tana iya zuwa da ma'anar  da take alaƙa da shari'a, domin Allah ya sanya dare da yini kowannensu yana zuwa a bayan ɗayan, saboda abinda ya kufce na aikin da ake yinsa ga Allah a cikin wani lokaci, a iya ramukonsa a wani lokacin na-daban.

An ruwaito daga Shaƙiƙ, ya ce: Wani Mutum ya zo wurin Umar ɗan  Khaddab -RA- sai  ya ce: Sallahta ta kuɓuce min, a wannan daren? Sai  ya ce: Ka riski abinda ya kuɓuce maka na sallar darenka a cikin yininka.

Don  haka, ya zo a cikin sunnah ko hadisi  faɗinsa SAW: Babu wani Mutum wanda sallar dare zata kasance masa, ko wani abu  na bauta a cikinsa, (wanda  bai yi su ba), sai  ya karanta shi a tsakanin sallolin asuba da na azahar, face Allah ya rubuta masa ladan sallarsa, shi kuma barcinsa zai kasance sadaka ne, a gare shi. Muslim ya ruwaito shi.

Wannan ya sanya Mutum idan ya yi barci bai yi sallar wutiri ba, ko ya manta, ko suka kuɓuce masa, sai ya sallaci abinda ya saba sallatarsu a cikin dare, da rana, zai rika sallama duk bayan raka'oi biyu, sai kuma ya sanya wuturin ya zama raka'oi biyu, da niyyar wutiri, A'isha -R.A- ta ce: Annabi -SAW- Idan barci ko cuta  suka shagaltar da shi bai yi sallar wutirinsa ba, sai  ya sallaci abinda ya kuɓuce masa raka'oi goma sha biyu a cikin yini. Muslim ya ruwaito.

Lallai cikin sassaɓawar dare da yini, da jirkitan sifofin zamani, akwai babban abin lura wanda zai jagoranci Musulmi yin tunani kan girman kudurar Allah da ikonsa, da cikakken ganin damarsa, da gane girmarsa wanda  bata da iyaka, sai hakan ya masa  jagora izuwa ga ƙanƙan  da kai da risinawa ga Mahaliccinsa Mai girma, sai kuma ya kwashe shi ga miƙa wuya a gare shi, da amsa masa  kan shari'arsa miƙaƙƙiya, Allah Ta'alah ya ce: Ga wanda ya so ya wa'azantu, ko ya yi nufin godiya.

Kuma lallai Ma'abuta imani, sune suke wa'azantuwa mai amfani, sai hakan ya haifar musu da tsoron Mahaliccinsu, da tsoron uƙubarSa, da kiyayarSa; sai  ya samar  musu da kammalallen taƙawa, da cikakken imani, da tauhidi mai tsarki, Allah Ta'alah ya ce: Lallai cikin mayewar dare da yini da abinda Allah ya halitta a cikin sammai da ƙassai akwai ayoyi ga Mutane masu taƙawa [Yunus: 6].

Kuma Allah Mabuwayin sha'ani ya ce: Shine Wanda ya sanya muku dare domin ku natsu a cikinsa, yini kuma abin ayi gani, lallai ne  cikin haka akwai ayoyi ga Mutane masu ji [Yunus: 67].

Na'am, saboda masu ji sune suke amfanuwa da ayoyin Allah na halitta, sai su wa'azantu da su, su kuma samu abin lura, sai hakan ya haifar musu da imani na gaskiya, da aiki mai tsarki, Allah Ta'alah ya ce: Ashe basu gani ba, lallai mun sanya dare domin su natsu a cikinsa, yini kuma mai sanya gani, lallai cikin wannan akwai ayoyi ga Mutane masu imani [Naml: 86].

Ya kai Mumini, Ka riƙi wa'azi da tunatarwa daga  sassaɓawar zamani, kuma ka kasance -a cikin halayenka- mai godiyar Allah, mai aiki da ɗa'oinsa, mai nisantar nau'ukan saɓa masa, Allah Ta'alah ya ce: Yana daga rahamarSa, Ya sanya muku dare da yini domin ku natsu a cikinsa, kuma domin ku  nema daga falalarSa, kuma tsammaninku za ku yi godiya [Ƙasas: 73].

Ibnu Kasir -Allah ya yi masa  rahama- ya ce: Ma'ana ku  yi godiya ga Allah ta hanyar aiki da nau'ukan ibadodi a cikin dare da yini.

'Yan'uwa Masu imani

Yana daga abin lura da wa'azozin sassaɓawar sifofin zamani, abinda halittu suke samun kansu a lokacin bazara na tsananin zafi, sai Mutane su riƙa neman  hanyoyin samun inuwa mai inuwantarwa, da iska mai sanyi da daɗi, to shin Musulmi -da irin  wannnan- yana tuna wutar Jahannama da zafinta, Allah ya tsare mu  daga hakan, Allah Ta'alah ya ce: Kuma suka ce: Kada ku fita zuwa yaƙi a cikin zafi, Ka ce: wutar Jahannama ce mafi tsananin zafi da sun kasance suna fahimta [Taubah: 81].

Kuma ya zo a cikin Bukhariy da Muslim, lallai Annabi -SAW- ya ce: Wuta ta kai kuka ga Ubangijinta, ta ce: sashena yana cinye sashe! Sai  ya mata izinin ta riƙa numfashi  biyu, na farko a lokacin sanyi, da kuma a lokacin zafi, kuma shine mafi tsananin abinda kuke samu na zafi, da abinda kuke samu na jaura (wato, sanyi). Bukhariy da Muslim.

Sai kayi sauri da gaggawar aikata dukkan aiki na kwarai; wanda zai kusantar da kai ga Mabuwayi Mai girma, kuma ka kiyaye ayyukan saɓo masu halakarwa, Allah Ta'alah ya ce: Kuma ina muku gargadin wuta mai babbaka * Babu mai shigarta sai mafi shagawa * Wanda ya ƙaryata kuma ya juya baya * kuma lallai za a nesanta mafi taƙawa daga faɗawa cikinta * Wanda ya bayar da dukiyarsa yana neman tsarkaka * alhalin babu wani da ya ke da wata ni'imar da ake neman sakamakonta * face dai neman yardar UbangijinSa mafi ɗaukaka * Kuma da sannu zai yarda.

Kuma Magabatan kwarai dangane da al'amarin kulawa da sassaɓawan zamani lallai suna da sha'ani mai girma, Ga Umar -Allah ya ƙara yarda a gare shi- yana yin wasiyya ga ɗansa cewa, ya riƙa aiki da sifofin imani, kuma daga cikinsu sai ya ambaci, Yin azumi a lokaci matsanancin zafi.

Kuma a lokacin da Umar ya yi jinyar ajalinsa sai  ya ce: Ya Allah! lallai ka  san ba ina  son zama a Duniya ne, domin janyo ƙoramai, ko dashen bishiyoyi ba, sai domin ƙishin azumi a lokutan zafi, da yin ibadar dare, da shiga jikin Malamai a halƙoƙin zikiri.

Kuma an hakaito daga Abdullahi ɗan Umar da wasu daga magabatan kwarai -Allah ya ƙara yarda a gare su- lallai su idan suka sha ruwan sanyi sai su yi kuka, suna masu tuna faɗin Allah Ta'alah dangane da kafirai: Ku zubo akanmu daga ruwa, ko daga abinda Allah ya azurta ku. Sai su ce: Lallai ne Allah ya haramta su ga kafirai [A'araf: 50].

Huɗuba ta biyu

Watan Zulƙi'idah yana cikin watanni hajji, kuma yana cikin watanni huɗu masu alfarma, waɗanda Allah ya ɗaukaka, kuma ya basu girma da alfarma, Abdullahi ɗan  Abbas -Allah ya ƙara yarda a gare su- ya ce: Allah ya kebance watanni guda huɗu, ya sanya suka zama masu alfarma, kuma ya girmama alfarmar tasu, kuma ya sanya aikin zunubi a cikinsu ya zama mafi muni, kuma ya sanya aikin kwarai da lada a cikinsu suka fi girma.

Kuma Ma'abuta ilimi sun bayyana cewa yin Umrah a watan Zulƙi'idah sunnah ne, saboda umrar Annabi SAW guda huɗu dukansu sun kasance a cikin Zulƙi'idah kamar  yadda ambaton hakan ya zo cikin Sahihul Bukhariy da Muslim daga Anas -Allah ya ƙara yarda a gare shi-.

Kuma an ruwaito daga A'isha -Allah ya ƙara yarda a gare ta- ta ce: Manzon Allah SAW- bai taɓa yin umrah ba, sai a cikin watan Zulƙi'idah. InbuMajah ya ruwaito shi da isnadi mai inganci.

Ibnul-Ƙayyim -Allah ya yi masa rahama ya ce: Saidai Allah bai kasance zai zaɓa wa AnnabinSa  a al'amarin umrorinsa ba, face lokutan da suka fi dacewa, kuma suka fi cancantar ayi umrar a cikinsu.

الحذيفي 18 شوال 1440 HUDUBAR MASALLACIN MANZON ALLAH SAW

HUDUBAR MASALLACIN ANNABI

(صلى الله عليه وسلم)

JUMA'A, 18/Shawwal /1440H

daidai da 21/June/ 2019M

LIMAMI MAI HUDUBA

SHEIKH DR. ALIYU DAN ABDURRAHMAN ALHUZAIFIY

TARJAMAR

ABUBAKAR HAMZA

YI MA KAI HISABI KAN YIN KWAZO CIKIN XA'OI

(محاسبة النفس والاجتهاد في الطاعات)

Shehin Malami wato: Aliyu bn Abdurrahman Alhuzaifiy–Allah ya tsare shi- ya yi hudubar juma'a mai taken: YI,Wanda kuma a cikinta ya tattauna, akan

بسم الله الرحمن الرحيم

HUDUBAR FARKO

Yabo ya tabbata ga Allah Mabuwayi Mai yawan gafara,  yana juyar da dare akan yini, kuma yana juya yini akan dare, lallai cikin haka akwai abin lura ga Ma'abuta basirori.

Ina yin yabo ga Ubangijina kuma ina gode masa akan ni'imominSa waxanda babu wanda yake qididdige su idan ba shi ba, daga cikin waxanda muka sansu, da waxanda bamu sani ba, Sunayen Ubangijinmu sun tsarkaka, kuma sifofinsu sun girma, Babu abin bautawa da gaskiya sai Allah; Makaxaici Mai rinjaye

Kuma ina shaidawa lallai annabinmu kuma shugabanmu Muhammadu bawanSa ne manzonSa, Mai yin albishir da rahamar Allah da AljannarSa, Mai gargaxi kan uqubobin Duniya da faxawa Wuta.

Ya Allah ka yi daxin salati da sallama da albarka ga bawanka kuma manzonka Muhammadu, da IyalanSa da SahabbanSa masu biyayya.

Bayan haka;

Ku kiyaye taqawar Allah Subhanhu Wa Ta'alah ta hanyar neman yardarSa, da kiyayar fushinSa da uqubobinSa, Allah سبحانه  ya ce: "Kuma Ubangijinka yana halittar abinda ya ga dama, kuma yana yin zavi, Zabin bai kasance nasu ba ne, Tsarki ya tabbata ga Allah, kuma (Allah) ya xaukaka daga barin abinda suke yi na shirka " [Qasas: 68].

Don haka, Ubangiji Mabuwayi da xaukaka ya halicci halitta da qudurarSa da iliminSa da hikimarSa da jin-qanSa. Kuma ya samar da wannan Duniyar da muke gani, kuma ya sanya masa iyakar da za su kai gare shi; ba za su qetare shi ba, kuma ya halicci sabubba a cikin wannan Duniyar da muke gani, kuma ya halicci abinda za su kasance da waxannan sabubban, don haka, shine Mahaliccin sabubba da abinda suke kasantuwa da sababinsu, don haka, duk abinda Allah ya nufa sai ya kasance, wanda bai nufa ba kuma ba zai kasance ba, Allah Ta'alah ya ce: "Allah ne Mahalicci ga komai, kuma shi ne wakili akan komai * shi ke da mabuxan sammai da qasa, Waxanda suka kafirta da ayoyin Allah, waxannan sune masu hasara" [Zumar: 63].

Kuma Allah Ta'alah ya ce: "Ku saurara, Halitta tasa ce, da kuma bada umurni, Albarkar Allah Ubangijin talaikai ta yawaita" [A'araf: 54].

Mutum halitta ne daga cikin halittun Allah masu ban mamaki, wanda Allah ya tattara masa daga sifofin al'ajabin da suka rarrabu ga waninsa, Allah Ta'alah ya ce: "Kuma haqiqa mun halitta Mutum cikin mafi kyawun tsayuwa" [Tin: 4].

Kuma Allah Subhanahu ya ce: "Kuma a cikin rayukanku (akwai ayoyi na al'ajabi), To ba za ku duba ba?" [Zariyat: 21].

Kuma Allah Subhanahu ya ce: "Yana daga ayoyinSa: yadda ya halitta ku daga turvaya, sai ga ku kun zama Mutane kuna watsuwa" [Rum: 20].

Kuma Allah Tabaraka Wa Ta'alah ya yi baiwar karramawa ga 'yan Adam, Allah Mabuwayi da xaukaka ya ce: "Kuma haqiqa mun girmama 'yan Adam, kuma muka xauke su a tudu da teku, kuma muka azurta su daga abubuwa masu daxi, kuma muka fifita su akan masu yawa daga abinda muka halitta, fifitawa" [Isra'i: 70].

Ita kuma karramawar Allah Ta'alah ga 'yan Adam, karramawa ce ga na kirki da fajiri, a cikin wannan Duniyar, ta hanyar basu ni'imomi. Kevantacciyar karramawa kuma a Lahira, da samun yardar Allah da Aljannonin ni'ima ga muminai ta ke, saboda Kafiri bashi da wani rabo a Lahira, kuma "Ubangijinka baya zaluntar kowa" [Kahf: 49]. Saboda Allah a Lahira baya karrama wani face wanda ya masa xa'a daga Mutane da Aljanu, Ibnu-Asakir ya ruwaito  daga hadisin Anas xan Malik -رضي الله عنه- daga Manzon Allah -صلى الله عليه وسلم- ya ce: Lallai Mala'iku sun ce: Ya Ubangijinmu, ka halicce mu, kuma ka halitta 'yan Adam, sai ka sanya suna cin abinci, suna shan abin sha, kuma suna sanya tufafi, kuma suna auren Mata, kuma suna hawan dabbobi, suna yin barci suna hutawa, mu kuma baka sanya mana wani abu daga cikin haka ba, to ka basu Duniya, mu kuma Lahira! Sai Allah Mabuwayi da xaukaka ya ce: Ba zan sanya wanda na halitta da hannuna ba, kuma na busa masa daga ruhina, ya zamto kamar wanda nace masa: Kasance, sai ya kasance ba.

 Hadisin yana da shahid daga hadisin Abdullahi xan Amru, a wajen Imam Axxabaraniy.

Kuma yana daga MANYAN NI'IMOMIN ALLAH GA 'YAN ADAM: ABINDA YA HORE MUSU NA AMFANI DA MASLAHOHI DA NI'IMOMI, Allah Subhanahu ya ce:  "Ashe, baku gani ba, cewa: Allah ya hore muku abinda yake cikin sammai da abinda ke a cikin qassai, kuma ya zuba ni'imominSa akanku, bayyannu da voyayyu" [Luqman: 20].

Kuma Allah Mabuwayi da xaukaka ya ce: "Kuma ya hore muku abinda ke cikin sammai da qasa, gaba xaya daga gare shi. Lallai a cikin haka, akwai ayoyi ga Mutanen da suke tunani " [Jasiya: 13].

Kuma hikimar zubo ni'imomi ga 'yan Adam, ita ce, domin su miqa wuya ta hanyar xa'a ga Allah Ta'alah, kuma su gode masa, kada su haxa shi da wani (shirka), Allah Ta'alah ya ce: "Kamar haka (Allah) yake cike ni'imominSa akanku, tsammaninku zaku sallama masa" [Nahl: 81].

Ibnu-Kasir -رحمه الله- a tafsirinsa ya ce: "Kamar haka, Allah yake sanya muku abinda kuke amfani da shi cikin al'amuranku, da kuma abinda kuke da buqatuwa gare shi, domin ya kasance taimako a gare ku, wajen yin xa'a a gare shi da kuma bautarsa", maganarsa ta qare.

Kuma Allah Mabuwayi da xaukaka bai azizita ambaton Mutum ba, tun daga lamarin halittar annabi Adamu -عليه السلام- da hannunSa, da abinda ya bayyana na matakai da halin Mutum, sai don ya bayyana masa aikinsa a cikin wannar rayuwar, kuma ya ilmantar da shi ayyukansa, da hikimar halittarsa; da cewar Mutum shine mahallin kallafawar Allah, da bashi umurni da hani, da kasancewarsa shine mai xaukar amanar shari'a, da samun xaukaka sakamakon ibadarsa ga UbangijinSa, Allah Ta'alah ya ce: "Shin, Mutum zato yake yi cewa, a barshi sagaga?" [Qiyama: 36].

Shafi'iy -رحمه الله- ya ce: "sagaga, wato, ba za a umurce shi, a hana shi ba!".

Kuma Allah Ta'alah ya ce: "Shin, zato kuke yi cewa, mun halicce ku domin wasa, kuma lallai ku zuwa gare mu ba za mayar da ku ba?" [Mu'uminuna: 115].

Daga abinda Allah Subhanahu ya bayyana mana na sunnonin gudanar da wannan Duniyar, da abinda ya halitta a cikin Duniya na sabbuba, lallai Allah Subhanahu wa Ta'alah ya bayyana mana sunnarsa a cikin wannan rayuwar, da kuma cewa: Lallai ayyukan Mutum suna kawo gyara ga rayuwa, matuqar sun kasance ayyuka nagari, kuma lallai varna tana shiga rayuwar halittu idan ayyukan Mutum suka zama gurvatattu. Kuma lallai ayyukan Mutum, lamarin kyansu da gurvacewarsu yana yin naso, har ga dabbobi da tsirrai, domin rahamar Allah da adalcinsa, kuma domin Mutum ya lazimci ayyukan xa'oi, ya riqa qaurace wa ayyukan haram, Allah Subhanahu yana faxa dangane da yadda rayuwa take albarka ake samun alherorinta, idan ayyukan Mutane suka zama nagari: "Da Ma'abuta alqaryu za su yi imani su yi taqawa, to haqiqa mun buxe musu albarkoki daga sammai da qasa, saidai sun qaryata sai muka kama su da abinda suka kasance suke aikatawa" [A'araf: 96].

Kuma Allah Ta'alah ya ce: "Kuma da Ma'abutan littafi sun yi imani, kuma sun yi taqawa, da mun kankare miyagun ayyukansu, kuma da mun shigar da su Aljannonin ni'ima * Kuma da sun tsayar da Attaura da injila da abinda aka saukar zuwa gare su daga Ubangijinsu, haqiqa da sun ci daga samansu da kuma qarqashin qafafunsu" [Ma'ida: 65-66].

Alqur'ani shine littafin da Allah ya sauqar da shi ga Musulmai da kuma Ahlul kitabi, babu wani da iya canza abinda ke cikinsa, Allah Ta'alah ya ce: "Waxanda suka yi imani, kuma basu cakuxa imaninsu da zalunci ba, waxannan suna da aminci, kuma sune shiryayyu" [An'am: 82]. Wato, basu cakuxa imaninsu da shirka ba, kamar yadda Annabi -صلى الله عليه وسلم- ya fassara shi da shi.

Kuma Allah Ta'alah ya ce: "Ya ku waxanda suka yi imani idan kuka taimaki Allah sai ya taimake ku" [Muhammdu: 7]. Wato, idan kuka taimaki addinin Allah, sai Allah ya taimake ku.

Kuma Allah Ta'alah ya ce: "Waxanda suke idan muka ba su iko a bayan qasa, sai su tsayar da salla, kuma su bayar da zakka, kuma su yi umurni da kyakkayawa, kuma su yi hani da mummuna, kuma aqibar al'amura ga Allah take" [Hajj: 41].

Ibnu-kasir a tafsirinsa ya ce: "Umar xan Abdul'aziz -رحمه الله- ya yi huxuba sai ya karanta wannan ayar, sannan ya ce: Lallai ayar ba ga shugaba shi kaxai take ba, saidai ta shafi shugaba da wanda ake shugabantansu, Shin ba zan baku labarin abinda naku akan shugaba daga cikin haka, da kuma abinda na shugaba akanku daga cikinta ba? Lallai kuna da haqqi akan shugaba daga cikin haka, ya kama ku da haqqoqin Allah wanda suke kanku, kuma ya karvi haqqin sashenku da yake kan sashe, kuma ya shiryar da ku ga hanyar da tafi miqewa, gwargwadon iko. Kuma lallai akanku akwai wajabcin yi masa biyayya".

Kuma a cikin faxinSa Maxaukaki "Kuma aqibar al'amura ga Allah take" [Hajj: 41]. Akwai bada aminci ga wanda ya tsayu da waxannan al'amurran guda huxu (tsayar da sallah, bada zakka, umurni da kyakkyawa, da hani ga mummuna), daga tsoron wasu da kuma kaidin maqiya, kamar yadda Allah Ta'alah ya ce: "Kuma idan kuka yi haquri, kuka yi taqawa, makircinsu ba zai cutar da ku da komai ba, lallai Allah ga abinda suke aikatawa Mai kewayawa ne" [Ali-imrana: 120].

Kuma kamar yadda gyaruwar ayyukan Mutum ya kan zama sababi na gamewar alkhairi ga halittu, to kuma haka alherin ya kan kevanci wanda yake aikin, kamar yadda Allah Ta'alah ya ce: "Wanda ya yi aiki nagari; daga cikin maza ko mata, alhalin yana Mumini, to lallai haqiqa za mu rayar da shi rayuwa mai daxi, kuma haqiqa za mu saka masa ladansa da mafi kyawun abinda suka kasance suna aikatawa" [Nahl: 97].

Kuma a daura da wannan, lallai lalacewar aikin Mutum yana cutar da Mutumin, kuma yana shigar da varna ga dukkan rayuwa, Allah Subhanahu ya ce: "Kuma da sarkiya (Allah) zai bi son zuciyoyinsu, da sammai da qasa da abinda ke cikinsu sun lalace" [Muminuna: 71].

Kuma Allah Ta'alah ya ce: "Varna ta bayyana a sarari da teku, saboda abinda hannayen Mutane suka aikata, domin Allah ya xanxana musu sashen abinda suka aikata, tsammaninsu za su komo (gare shi)" [Rum: 41].

Kuma Allah Ta'alah ya ce: "Kuma babu abinda zai same ku na musifa, face daga abinda hannayenku suka aikata, kuma Allah yana yafewar waxansu laifukan dayawa" [Shira: 30].

Kuma ka yi dubi -Ya kai Mutum- ga halin waxanda suka munana ayyuka, menene ya sauka akansu, Allah Ta'alah ya ce: "Kuma dayawa muka karya wata alqarya, wanda ta kasance mai zalunci, sai muka qagi halittar waxansu  Mutane na daban a bayanta" [Anbiya'i: 11].

Kuma an ruwaito daga Abdullahi xan Umar -رضي الله عنهما- ya ce: Manzon Allah -صلى الله عليه وسلم- ya ce: "Abu biyar suna aukuwa da abu biyar; Alfasha bata bayyana a cikin wasu Mutane, har su bayyanar da ita, face annoba da cutuka sun bayyana waxanda basu kasance a cikin Mutanen da suka gabace su ba, kuma matuqar shugabanninsu basu yi hukunci da littafin Allah ba, face Allah ya sanya faxansu a tsakaninsu, kuma Mutane ba za su hana zakkar dukiyoyinsu ba, face an kama su da fari da kuma kafewar ruwan sama, kuma ba don dabbobi ba, da ba a musu ruwa ba. Kuma ba za su tauye sikili ba face an kama su da fari, da zaluncin shugabanni. Kuma ba za su warware alqawarin Allah da alqawarin ManzonSa ba, face Allah ya qaqaba musu maqiya, sai su riqa xauke sashen abinda yake a hannunsu", Ibnu-Majah ya ruwaito shi.

Kuma Allah Ta'alah ya ce: "Kuma Mutum ba shi da komai face abinda ya aikata * Kuma lallai aikinsa za a ganshi" [Najm: 39-40].

Allah ya yi mini albarka NI da KU, cikin alkur'ani mai girma, ya kuma amfanar da NI da KU da abinda ke cikinsa na ayoyi, da tunatarwa mai hikima,      Na faxi abinda ku ka ji, kuma ina neman gafarar Allah mai girma ga Ni da KU da kuma sauran Musulmai daga kowani zunubi, Ku nemi gafararSa,    lallai shi Mai gafara ne Mai rahama.

,,,          ,,,          ,,,

,,,          ,,,          ,,,

HUDUBA TA BIYU

            Godiya ta tabbata ga Allah Mabuwayi Mai yawan gafara, Mai haquri abin godiya. Ina yin yabo ga Ubangijina kuma ina gode masa, kuma ina tuba gare shi ina neman gafararSa; domin yabo na Ubangijina ne, a Duniya da Lahira, akan falalarSa da ni'imominSa, waxanda muka sani da waxanda bamu sani ba.

            Ina shaidawa babu abin bautawa da gaskiya sai Allah shi kaxai yake bashi da abokin tarayya; Masani abinda ke cikin qiraza.

            Kuma ina shaidawa lallai annabinmu kuma shugabanmu Muhammadu bawanSa ne manzonSa wanda aka turo shi da shiriya da kuma haske.

Ya Allah ka yi daxin salati da sallama da albarka ga bawanka kuma Manzonka Muhammadu, da iyalansa da sahabbansa masu rigaye zuwa ga dukkan aiki managarci.

 Bayan haka

Ku ji tsoron Allah Ta'alah, domin ku riqi hanya zuwa ga Allah; zai shigar da ku AljannoninSa, kuma za ku rabautu da samun yardarSa.

Ya kai Mutum

Ka duba abinda Allah ya maka na ni'imomi, wanda babu mai ikon ya qididdige su, sai ka tsayu da godiyarsu. Kuma da za a xauke maka mafi qarancin ni'ima, to babu wani wanda ba Allah ba wanda ke da ikon ya mayar maka da ita, tare da cewa babu kaxan ko qarami daga ni'imomin Allah.

Kuma lallai kai, -Ya kai Mutum- da daidaituwanka, da qoqarin kawo gyaranka, da yadda kake shuka alkhairi, da kange kai daga sharri, zaka kasance mai taimako wajen kiyaye al'ummarka, mai tsamar da kanka daga sharrace-sharrace da uqubobi.

Kuma ka sani, lallai kai abin tambaya ne kan ayyukanka, a cikin rayuwarka, da bayan mutuwarka, Sai ka yi dubi kan abinda za ka gaya wa Ubangijinka, Allah Ta'alah ya ce: "Ya kai Mutum, lallai ne kai mai aikin wahal da kai ne ga Ubangijinka, wahala mai tsanani, kuma kai mai haxuwa da shi ne * To, amma wanda aka baiwa littafinsa da damansa * to za a yi masa hisabi, hisabi mai sauqi * kuma ya juya ga iyalansa (a cikin Aljannah) yana mai raha * Amma wanda aka baiwa littafinsa daga bayan bayansa * to za shi dinga kiran halaka * kuma ya shiga wutar sa'ira" [Inshiqaq: 6-12].

Kuma ya zo cikin hadisi cewa: "Qafar Mutum ba za ta gusa ba, face an masa tambayoyi kan abu guda huxu; akan rayuwarsa ta yaya ya qarar da ita, da samartakarsa yaya ta qare, da dukiyarsa ta yaya ya neme ta, kuma yaya ya vatar da ita, da kuma iliminsa me ya aikata da shi".

Kuma ka sani -Ya kai Mutum- lallai gidanka mai wanzuwa mai dawwama itace take gabanka, bayan mutuwa, to madalla idan har ka rayar da ita da ayyukan kwarai, kuma bone ya tabbata akanka idan ka yarda da Duniyarka, ka manta da Lahirarka; saboda Duniyarka zata juya maka, kana so ko kana qi, Ita kuma Lahira tana fiskanto ka, akan abinda ka aikata.

Bayin Allah!

"Lallai ne Allah da Mala'ikunSa suna yin salati ga wannan Annabi, Ya ku wadanda suka yi imani ku yi salati a gare shi, da sallamar aminci" [Ahzab: 56].

Har qarshen addu'a.